پاۆەل الەكساندروۆ ەسىمدى ەكولوگ ەلگە اكەلىنەتىن ءار سمارتفون ءۇشىن جەكە كومپانياعا شامامەن 4000 تەڭگەدەن تولەم جاسالاتىنىن انىقتادى دەپ جازادى Dalanews.kz اقجايىق پورتالىنا سىلتەپ.

اتالعان تولەمنىڭ مەملەكەتتىك بيۋدجەتكە ەمەس، جەكە مەنشىك كاسىپورىننىڭ قورجىنىنا قۇيىلاتىنى جۇرتتىڭ نارازىلىعىن تۋدىرىپ وتىر.

2025 جىلدىڭ كوكتەمىنەن باستاپ، قازاقستاندا سمارتفونداردىڭ IMEI-كودتارىن تىركەۋ جۇيەسى ەنگىزىلدى. وسىعان بايلانىستى سيفرلىق دامۋ، يننوۆاسيالار جانە اەروعارىش ونەركاسىبى مينيسترلىگى ەلدەگى سمارتفونداردى «اق»، «سۇر» جانە «قارا» تىزىمگە بولگەن ەدى.

ابونەنتتىك قۇرىلعىلاردى باقىلاۋ مەن يدەنتيفيكاسيالاۋدىڭ ارنايى اقپاراتتىق جۇيەسى اشىلىپ، وندا ءاربىر ازامات ايىنا ەكى سمارتفون مەن ەكى پلانشەتتى تەگىن تىركەي الادى. ال زاڭدى تۇلعالارعا بۇلاي ىستەۋ تەگىن ەمەس – ءاربىر قۇرىلعى ءۇشىن شامامەن 4000 تەڭگەدەن تولەۋگە مىندەتتەلگەن.

قازاقستانعا جىلىنا ورتا ەسەپپەن 4 ملن-عا جۋىق سمارتفون رەسمي تۇردە اكەلىنەدى. دەمەك، بۇل تارتىپكە سايكەس، جىل سايىن يمپورتتاۋشىلاردىڭ قالتاسىنان شامامەن 16 ملرد تەڭگە جەكە مەنشىك كومپانياعا اۋدارىلادى دەگەن ءسوز. سايىپ كەلگەندە، مۇنىڭ اۋىرتپالىعىن قاراپايىم حالىق كوتەرەتىنى انىق. ال وسىنشاما مول قاراجات بيۋدجەتكە ەمەس، 2023 جىلى عانا قۇرىلعان جەكە كاسىپورىنعا جىبەرىلەتىنى – قوعامدا كۇماندى ساۋالدار تۋعىزىپ وتىر.

اتالعان ءىرى كولەمدەگى قاراجاتتى الۋشى – توو «ATS Mediafon KZ». كومپانيا 2023 جىلدىڭ ساۋىرىندە «ATS Advanced Telecom Solutions» اتاۋىمەن قۇرىلعان. نەگىزگى قىزمەتى – باعدارلامالىق كودتاردى ازىرلەۋ جانە تەستىلەۋ دەپ كورسەتىلگەن. Kompra.kz دەرەكتەرىنە قاراعاندا، كومپانيانىڭ ديرەكتورى ءارى قۇرىلتايشىسى – ۆلاديسلاۆ سافاروۆ ەسىمدى ازامات. ول سونداي-اق كوتەرمە ساۋدامەن اينالىساتىن «AVS ALLIANCE» جانە باعدارلامالىق-اپپاراتتىق كەشەندەردى ورناتۋمەن شۇعىلداناتىن «KAZAKHSTAN HERITAGE» سەرىكتەستىكتەرىن دە باسقارادى ەكەن.

مەملەكەتتىك ورگانداردىڭ بۇل جاعدايدى بايقاماۋى ءتىپتى تاڭعالدىرادى. سەبەبى «ATS Mediafon KZ» وسى ۋاقىتقا دەيىن ەشقانداي قىزمەت اتقارماعان، بيۋدجەتكە ءبىر تەڭگە دە سالىق تولەمەگەن.

سوعان قاراماستان، ميللياردتاعان قاراجاتتى يەمدەنۋدىڭ جولى اشىلعان. ءقازىردىڭ وزىندە كومپانيا Headhunter پورتالىندا جالاقىسى جوعارى ءۇش بوس ورىن جاريالاپ ۇلگەرگەن.

«اق جايىق» باسىلىمى وسىعان وراي قۇزىرلى ورگانداردان، اسىرەسە سيفرلىق دامۋ، يننوۆاسيالار جانە اەروعارىش ونەركاسىبى مينيسترلىگىنەن مىنا سۇراقتارعا جاۋاپ بەرۋىن تالاپ ەتكەن ەكەن:

• ءاربىر سمارتفوندى تىركەۋ قۇنى – شامامەن 4000 تەڭگە دەگەن ەسەپ قايدان الىنعان؟
• نەلىكتەن اتالعان قاراجات تەك وسى ماقسات ءۇشىن جاڭادان قۇرىلعان، جەكە مەنشىك فيرمانىڭ شوتىنا اۋدارىلۋدا؟
• مينيسترلىك مۇنداي «دەلدال» كومپانيالاردىڭ قۇرىلۋىنا نە سەبەپتى جول بەرىپ وتىر جانە وعان كوز جۇما قارايتىن سەبەبى نەدە؟