ءقازىر جاڭاجول اۋىلىندا جۇمىس قارقىندى. وكرۋگ اكىمى مولدابەك بيتەمىروۆتىڭ ايتۋىنشا، اۋىل تۇرعىندارى قىزىلشانىڭ «پاۆلو»، «بورو»، «ۆودان F1» اتتى تۇقىمدارىن شەتەلدەن الدىرىپ، وتباسىلىق بيزنەس رەتىندە ءوز ۇيلەرىنىڭ ىرگەسىندەگى شاعىن القاپقا ەگىپ جاتىر. اۋىل اقساقالى قالمۇحامەد جالەلوۆ جوعارىدا اتالعان سۇرىپتار ءدال وسى جاڭاجول اۋىلىنىڭ توپىراعىندا ءوسىپ شىققاندا عانا ەرەكشە دامگە يە بولاتىنىن، سوندىقتان مۇندا قىزىلشاعا جوعارى سۇرانىس بار ەكەنىن جەتكىزدى.
قازىرگى تاڭدا ديقاندار 25 گەكتارعا تۇقىم ەگىپ ۇلگەرگەن. سونداي-اق ەگىلگەن تۇقىمدى قىمتاپ، قىستىڭ قاتتى اۋا-رايىنان قورعايدى. 2 جارىم ايدان كەيىن ءونىم بەرە باستايتىن كوكونىستىڭ بۇل تۇرىنەن گەكتارىنا 25-30 توننا ءونىم الۋعا بولادى ەكەن. ودان كەيىن ديقاندار ەكىنشى ءونىم رەتىندە قىزاناق، قيار جانە مال ازىقتىق داقىلدارىن ەگەدى.
«قىزىلشا ەگىلەتىن جەر وتە قۇنارلى بولۋى ءتيىس. ول ءۇشىن سەليترا، امموفوس، مالدىڭ قيلارى ارقىلى جەر تىڭايتىلادى. اگروتەحنيكالىق شارالاردىڭ باسىم بولىگى قولدىڭ كۇشىمەن ىستەلەتىندىكتەن، قىزىلشا ەگۋ ءۇشىن قاجىرلى ەڭبەك كەرەك ەكەنى ەسكەرىلۋى ءتيىس. قاجىرلى ەڭبەكتىڭ سوڭى – ۇلكەن تابىسقا الىپ كەلەدى» – دەدى وكرۋگ اكىمى م.بيتەمىروۆ.
ايتا كەتەيىك، بىلتىر ەرتە كوكتەمدە ءونىم العان ا.قالىبەكوۆ اۋىلدىق وكرۋگىنىڭ ديقاندارى الماتى، استانا، قاراعاندى قالالارىنا جانە رەسەي مەملەكەتىنە قىزىلشا ساتىپ، تابىس تاپقان. بيىل دا بۇل باعىتتا جۇمىس جۇرەدى.
