يننوۆاسيالىق جوبالار تولىق ىسكە اسقان كەزدە ەكى مىڭعا جۋىق جاڭا جۇمىس ورنى اشىلادى. ءوندىرىستى وڭىرگە ينۆەستورلار تارتۋ شارالارى جالعاسىپ جاتىر. جالپى وبلىستىڭ الەۋمەتتىك-ەكونوميكالىق دامۋ قارقىنى باسەڭدەگەن جوق. بيىلعى جىلدىڭ وتكەن كەزەڭىندە ءوندىرىس كولەمى 4،7 پايىزعا وسكەن.
نەگىزگى كاپيتالعا ينۆەستيسيا سالۋ كولەمى 268 ملرد تەڭگەگە دەيىن ۇلعايدى. ينۆەستورلاردى تارتۋ ءۇشىن ءتيىمدى ۇسىنىس، قولايلى جاعداي بولۋى ءتيىس. بۇل ورايدا «اقتوبە» يندۋستريالدى ايماعىنا ورنالاسقان كاسىپورىنداردىڭ ۇتىلماسى انىق. مۇندا قۇنى 2،5 ملرد تەڭگە بولاتىن كولىك-لوگيستيكالىق ورتالىعىنىڭ ىرگەتاسى قالاندى.
حالىقارالىق ستاندارتتارعا ساي سالىناتىن ورتالىقتا جۇك تاسىمالى ءۇشىن تىكەلەي تەمىرجول تارتىلادى. يندۋستريالدى ايماقتا سىرلى بوياۋ سەحىنىڭ، 3 D تەحنولوگياسىمەن كەراميكالىق پليتا جانە گرانيت تاس شىعاراتىن زاۋىتتىڭ قۇرىلىسى باستالادى.
ال جاقىندا قۇرىلىس ماتەريالىنىڭ 5 ءتۇرىن شىعاراتىن سەح ىسكە قوسىلدى. شىنى ماقتا ارالاس ءۇشقاباتتى كىرپىشتىڭ ەلىمىزدە بالاماسى جوق.
ەسمىرزا بايتۇرسىنوۆ، كاسىپورىننىڭ اتقارۋشى ديرەكتورى:
– ونىڭ ەرەكشەلىگى ىشىندە – الدىڭعى قاباتىندا ماقتامەن قاپتالادى، ەكىنشىسى دە بەتونمەن بەكىتىلەدى. سوندىقتان ول وتە ءتيىمدى ءارى جىلى بولادى. اۋەلى وسى ءوزىمىزدىڭ اۋدانداردى قامتاماسىز ەتەمىز، سودان كەيىن شەت جاقتاردى قارايمىز.
وبلىستا جىل باسىنان بەرى 389،7 مىڭ شارشى مەتر تۇرعىن ءۇي پايدالانۋعا بەرىلدى. جىل اياعىنا دەيىن بىرنەشە ءۇيدىڭ قۇرىلىسى اياقتالۋى ءتيىس. جالپى «نۇرلى جەر» باعدارلاماسىن ىسكە اسىرۋدا اقتوبەكوش باستاپ تۇر. بيىل اۋماعى 25 مىڭ شارشى مەتر بولاتىن 194 كوتتەدج بەن 22 شاعىن قاباتتى تۇرعىن ءۇي پايدالانۋعا بەرىلەدى.
باسپانا جەر كەزەگىندە تۇرعاندارعا بەرىلەدى. ولار «تۇرعىن ءۇي قۇرىلىس جيناق» جۇيەسى ارقىلى ءۇي باعاسىنىڭ 30 پايىزىن جيناپ، قالعانىن نەسيەگە راسىمدەي الادى. پاتەردىڭ ءبىر شارشى مەترى 120 مىڭ تەڭگە شاماسىندا. ياعني رەسپۋبليكا بويىنشا ەڭ تومەنگى باعا بەكىتىلگەن.
داۋرەن ورازبايەۆ، مەردىگەر كومپانيانىڭ وكىلى:
– «نۇرلى جەر» باعدارلاماسى بويىنشا «نۇر اقتوبە» اۋدانىنان كوپقاباتتى جانە جەكە تۇرعىن ءۇي قۇرىلىسىن جۇرگىزىپ جاتىرمىز. قۇرىلىس بۇيىمدارىنىڭ 85 پايىزى – جەرگىلىكتى ءونىم. باعدارلاما وتە قولجەتىمدى. سەبەبى، شارشى مەتردىڭ باعاسى 120 مىڭ تەڭگەدەن اسپايدى. قۇرىلىس جوسپار بويىنشا جۇرگىزىلىپ جاتىر.
وڭىردە اۋىلشارۋاشىلىعى ونىمدەرىن شىعارۋ كولەمى 3،9 پايىزعا، قۇرىلىس جۇمىستارىن اتقارۋ 10،3 پايىزعا وسكەن. جەكەمەنشىك پەن مەملەكەتتىك ارىپتەستىك نەگىزىندە قىزمەت كورسەتەتىن الەۋمەتتىك نىسانداردىڭ قۇرىلىسى قارقىندى ءجۇردى. 40-قا جۋىق بالاباقشا جانە بىرنەشە مەديسينالىق مەكەمە وسى جاڭا جۇيەمەن جۇمىس ىستەپ تۇر.
ودان بولەك «تۋعان جەر» باعدارلاماسى اياسىندا الەۋمەتتىك ماڭىزدى نىساندار بوي كوتەردى.
