تاۋەلسىزدىكتىڭ 25 جىلدىعىنا وراي اقتوبە وبلىسىندا بىرنەشە كوشەگە جاڭا اتاۋ بەرىپ، ءمان-ماعىناسىز اتاۋلار جاڭارتىلاتىن بولدى. بۇل شەشىم وتكەن جىلى قابىلدانىپ، جۇمىس ءالى جالعاسىپ جاتىر.
– اقتوبە قالاسى بويىنشا يدەولوگيالىق تۇرعىدان ەسكىرگەن، كونەرگەن اتاۋلاردى قازاقتىڭ ءداستۇرلى اتاۋلارىمەن الماستىرۋعا ونوماستيكا شەشىم قابىلدادى. ادام ەسىمدەرى بەرىلمەيدى، تاريحي تۇلعالارعا نەمەسە ارنايى مەرەيتويعا بايلانىستى كوشە اتاۋى جاڭارادى. وسى جۇمىسقا بايلانىستى اقتوبە قالاسىندا جاڭادان اشىلىپ جاتقان شاعىن اۋداندارعا اتاۋ بەرىلىپ جاتىر. اتاۋسىز تۇرعان 216 كوشەگە قازاقتىڭ ءداستۇرلى اتاۋى بەرىلدى. ال اتاۋى ەسكىرگەن 35 كوشەنىڭ اتاۋى جاڭارتىلادى. ونىڭ ىشىندە ميرزويان كوشەسى بار. ميرزويان كوشەسى ەندى ءاليحان بوكەيحانوۆ كوشەسى بولادى. بۇل اتاۋلاردىڭ ءبارى رەسپۋبليكالىق ونوماستيكالىق كوميسسياعا جىبەرىلىپ، وڭ تۇجىرىمى الىندى. ۇيعارىمى قولىمىزدا، – دەيدى اقتوبە وبلىستىق تىلدەردى دامىتۋ باسقارماسىنىڭ باسشىسى گۇلايىم تولەبايەۆا.
ايتا كەتەيىك، رەسپۋبليكالىق ونوماستيكالىق كوميسسيا بەكىتكەن ءتىزىم ەندى وبلىستىق ءماسليحاتتىڭ سەسسياسىندا قارالىپ، بەكىتىلەدى. بۇل 2018 جىلدىڭ ەنشىسىندە.
