Aqtóbede Mırzoıan kóshesi Álıhan Bókeıhanov bolyp ózgertiledi

Dalanews 29 jelt. 2017 02:27 447

Aqtóbede Mırzoıan kóshesi endi Álıhan Bókeıhanov kóshesi bolyp ózgertilýi múmkin. Ol úshin Respýblıkalyq onomastıka komısıasynyń sheshimin oblystyq máslıhat bekitýi kerek, dep habarlaıdy QazAqparat.

Táýelsizdiktiń 25 jyldyǵyna oraı Aqtóbe oblysynda birneshe kóshege jańa ataý berip, mán-maǵynasyz ataýlar jańartylatyn boldy. Bul sheshim ótken jyly qabyldanyp, jumys áli jalǵasyp jatyr.

– Aqtóbe qalasy boıynsha ıdeologıalyq turǵydan eskirgen, kónergen ataýlardy qazaqtyń dástúrli ataýlarymen almastyrýǵa onomastıka sheshim qabyldady. Adam esimderi berilmeıdi, tarıhı tulǵalarǵa nemese arnaıy mereıtoıǵa baılanysty kóshe ataýy jańarady. Osy jumysqa baılanysty Aqtóbe qalasynda jańadan ashylyp jatqan shaǵyn aýdandarǵa ataý berilip jatyr. Ataýsyz turǵan 216 kóshege qazaqtyń dástúrli ataýy berildi. Al ataýy eskirgen 35 kósheniń ataýy jańartylady. Onyń ishinde Mırzoıan kóshesi bar. Mırzoıan kóshesi endi Álıhan Bókeıhanov kóshesi bolady. Bul ataýlardyń bári respýblıkalyq onomastıkalyq komısıaǵa jiberilip, oń tujyrymy alyndy. Uıǵarymy qolymyzda, – deıdi Aqtóbe oblystyq tilderdi damytý basqarmasynyń basshysy Gúlaıym Tólebaeva.

Aıta keteıik, respýblıkalyq onomastıkalyq komısıa bekitken tizim endi oblystyq máslıhattyń sesıasynda qaralyp, bekitiledi. Bul 2018 jyldyń enshisinde.

Usynylǵan
Sońǵy jańalyqtar