اقتوبەدە قورشاعان ورتانى لاستاعانى ءۇشىن كومپانياعا 1،2 ملرد تەڭگە ايىپپۇل سالىندى، دەپ حابارلايدى Dalanews.kz.

تابيعات قورعاۋ پروكۋراتۋراسىنىڭ تاپسىرماسى بويىنشا وبلىستىق ەكولوگيا دەپارتامەنتى «ينتەرگاز ورتالىق ازيا» اق-ى فيليالىنىڭ قىزمەتىنە تەكسەرۋ جۇرگىزدى.

تەكسەرۋ بارىسىندا، شالقار اۋدانىنداعى بوزوي جەراستى گاز قويماسىندا ەكى ۇڭعىما مىندەتتى ەكولوگيالىق رۇقساتسىز بۇرعىلانعانى انىقتالدى.

زاڭعا سايكەس، اتموسفەراعا شىعارىندىلاردى شىعارۋ جانە وندىرىستىك قالدىقتاردى ورنالاستىرۋدا قورشاعان ورتاعا ەميسسيالار ءۇشىن ارنايى رۇقسات قاجەت.

رۇقساتسىز ەميسسيالار نورماتيۆتەن جوعارى دەپ تانىلادى جانە بەلگىلەنگەن ليميتتەن ارتىق جيناقتالعان نەمەسە كومىلگەن قالدىقتاردىڭ كولەمىنە قاتىستى ون مىڭ پايىزى مولشەرىندە ايىپپۇل سالا وتىرىپ، اكىمشىلىك جاۋاپتىلىققا اكەپ سوعادى.

تەكسەرۋ قورىتىندىسىمەن كومپانياعا قاتىستى 1،2 ملرد تەڭگە ايىپپۇل سالۋمەن 4 اكىمشىلىك ماتەريال تىركەلدى.

ونىڭ ىشىندە 20 ملن تەڭگە كولەمىندەگى ايىپپۇلدى كاسىپورىن ەرىكتى تۇردە تولەپ، قالعان 1،1 ملرد تەڭگەدەن استام سوما بويىنشا سوتقا شاعىمداندى.

بۇگىنگى تاڭدا كومپانيا 20 ميلليون تەڭگە ايىپپۇلدى ءوز ەركىمەن تولەپ، قالعان 1،1 ملرد تەڭگەدەن استام سومماعا قاتىستى سوتقا شاعىم ءتۇسىردى.

ءبىرىنشى جانە اپەللياسيالىق ساتىلارداعى سوت شەشىمدەرىمەن ايىپپۇل سالۋ تۋرالى قاۋلىلار كۇشىندە قالدىرىلدى.

زاڭعا سايكەس، كومپانيا ءبىر اي ىشىندە 1،1 ملرد تەڭگە كولەمىندە ايىپپۇلدىڭ قالعان سوماسىن تولەۋگە مىندەتتى.

ايىپپۇلدار بەلگىلەنگەن مەرزىمدە تولەنبەگەن جاعدايدا، ماجبۇرلەپ ءوندىرىپ الۋ كوزدەلگەن.