الەۋمەتتىك جەلىدە اقتاۋ كاسپيي تەحنولوگيالار جانە ينجينيرينگ ۋنيۆەرسيتەتىنىڭ (Yessenov University) ستۋدەنتىمىن دەگەن ۆيدەو اۆتورى مەكەمە اكىمشىلىگى تاراپىنان سىبايلاس جەمقورلىق، قۋدالاۋ جانە زاڭسىزدىقتار جاسالىپ جاتقانىن مالىمدەدى. بۇل تۋرالى Telegram ارنادا ايتىلدى. ال Yessenov University باسپا ءسوز قىزمەتى وكىلى ستۋدەنتتىڭ ۇندەۋىنە پىكىر ءبىلدىردى، - دەپ حابارلايدى Dalanews.kz.

Cتۋدەنت ۆيدەودا ءبىرقاتار ماسەلەنى ايتقان.

"ش.ەسەنوۆ اتىنداعى كاسپيي تەحنولوگيا جانە ينجينيرينگ ۋنيۆەرسيتەتىنىڭ ستۋدەنتىمىن. مەن ايتاتىن ماسەلە - وسى ۋنيۆەرسيتەتتىڭ ستۋدەنتتەرى اراسىندا وتە وزەكتى تاقىرىپ"، - دەدى ول.

ونىڭ سوزىنشە، سونداي ماسەلەنىڭ ءبىرى ەكىنشى سەمەستردە تۇسكەن ستۋدەنتتەرگە قاتىستى.

"ولارعا ۋنيۆەرسيتەتكە اۋىسقان كەزدە سومانىڭ جارتىسىن - 300 مىڭ تەڭگەنى عانا تولەيتىنىن ايتادى. سونىمەن قاتار، ولاردىڭ قارىزى بولمايتىنى دا ايتىلادى. ءبىراق وقۋ جىلىنىڭ سوڭىندا ولار بولمايدى دەپ ۋادە بەرگەن قارىزدار بار بولىپ شىعادى. وسىلايشا ولار ءبىر اي ىشىندە قارىزدارىن جابۋى كەرەك. سوندىقتان ءبىزدىڭ ۋنيۆەرسيتەتتە مۇنداي قارىزدارى بارىن بىلمەيتىن ستۋدەنت وتە كوپ. نەگىزىنەن، مۇنداي ستۋدەنتتەر - باسقا ەلدەردىڭ ازاماتتارى"، - دەدى ول ۆيدەودا.

سونداي-اق، ستۋدەنت ۋنيۆەرسيتەتتە كەيبىر پاندەر سەمەستردىڭ ورتاسىندا قوسىلاتىنىن ايتتى.

"بۇل جاعداي ءبىرىنشى رەت بولىپ وتىرعان جوق. وقىتۋشىلاردىڭ ستۋدەنتتەرمەن قارىم-قاتىناسى - تاعى ءبىر ماسەلە. كەيبىر اۋديتوريالار جەرتولەدە ورنالاسقان، وندا جەلدەتۋ قۇرىلعىسى جوق، دەمالاتىن ەشتەڭە جوق. ءدارىس بارىسىندا تاقىرىپتى تۇسىندىرۋگە ۋاقىت جەتكىلىكسىز"، - دەيدى ستۋدەنت.

Yessenov University ستۋدەنتى وقىتۋشىلاردىڭ كەيبىر قىلىقتارىنا دا شاعىمداندى.

"دەنەشىنىقتىرۋ ءپانى وقىتۋشىلارىنىڭ ستۋدەنتتەرگە قاتىگەزدىكپەن قاراۋى. اسىرەسە، ەر مۇعالىمدەر ءوز مىندەتتەرىن ەلەمەي، ستۋدەنتتەردى ادەپسىز قيمىلدار جاساۋعا ءماجبۇر ەتەدى"، - دەدى ول.

سونىمەن قاتار، ۇندەۋ اۆتورىنىڭ سوزىنشە، بۇل ۋاقىتتا ولار قىزداردىڭ دەنە مۇشەلەرىنە قول تيگىزەدى.

"ولاردىڭ كەيبىرەۋلەرى ستۋدەنتتەردەن پارا سۇرايدى. سونىمەن قاتار، دەنە شىنىقتىرۋ ءپانىنىڭ مۇعالىمدەرى ءبىزدىڭ وقۋدان شىعۋىمىزعا سەبەپ بولۋى مۇمكىن ەكەنىن ايتىپ قورقىتادى"، - دەدى ول ءوز ۇندەۋىندە.

ستۋدەنتتىڭ سوزىنشە، فاكۋلتەت باسشىلارى ستۋدەنتتەردىڭ ماسەلەلەرىنە قىزىعۋشىلىق تانىتپايدى.

Yessenov University باسپا ءسوز قىزمەتى وكىلى ۆيدەو اۆتورىنىڭ ۇندەۋىنە پىكىر ءبىلدىردى.

"بىزگە مۇنداي شاعىممەن ستۋدەنت جۇگىنبەدى. ءقازىر ونىڭ قانداي فاكۋلتەتتەن ەكەنىن جانە ءبىزدىڭ ۋنيۆەرسيتەتتىڭ ستۋدەنتى مە، جوق پا، بىلمەيمىز. ءبىراق ىشكى تەرگەۋ باستالدى. ستۋدەنتتەر اراسىندا ساۋالناما جۇرگىزىلەدى"، - دەدى جوو باسپا ءسوز قىزمەتى وكىلى lada.kz-كە جاۋابىندا.

ۋنيۆەرسيتەتتىڭ باسپا ءسوز قىزمەتى وكىلدەرى وقۋ ورنىندا اشىق ءوتىنىش جۇيەسى بار ەكەنىن جانە ءانونيمدى شاعىم بەرۋدىڭ كوپتەگەن جولى بار ەكەنىن جەتكىزدى.

"ءبىزدىڭ ۋنيۆەرسيتەتتە سىبايلاس جەمقورلىققا قارسى قىزمەت، ستۋدەنتتىك پارلامەنت، الەۋمەتتىك جەلىلەر، رەكتور بلوگى، كۋراتورلار بار. ستۋدەنت ءانونيمدى تۇردە شاعىمدانىپ، ءوز پروبلەماسىن ايتا الادى"، - دەدى ول.