Áleýmettik jelide Aqtaý Kaspii tehnologiialar jáne injiniring ýniversitetiniń (Yessenov University) stýdentimin degen video avtory mekeme ákimshiligi tarapynan sybailas jemqorlyq, qýdalaý jáne zańsyzdyqtar jasalyp jatqanyn málimdedi. Bul týraly Telegram arnada aityldy. Al Yessenov University baspasóz qyzmeti ókili stýdenttiń úndeýine pikir bildirdi, - dep habarlaidy Dalanews.kz.
Ctýdent videoda birqatar máseleni aitqan.
"Sh.Esenov atyndaǵy Kaspii tehnologiia jáne injiniring ýniversitetiniń stýdentimin. Men aitatyn másele - osy ýniversitettiń stýdentteri arasynda óte ózekti taqyryp", - dedi ol.
Onyń sózinshe, sondai máseleniń biri ekinshi semestrde túsken stýdentterge qatysty.
"Olarǵa ýniversitetke aýysqan kezde somanyń jartysyn - 300 myń teńgeni ǵana tóleitinin aitady. Sonymen qatar, olardyń qaryzy bolmaityny da aitylady. Biraq oqý jylynyń sońynda olar bolmaidy dep ýáde bergen qaryzdar bar bolyp shyǵady. Osylaisha olar bir ai ishinde qaryzdaryn jabýy kerek. Sondyqtan bizdiń ýniversitette mundai qaryzdary baryn bilmeitin stýdent óte kóp. Negizinen, mundai stýdentter - basqa elderdiń azamattary", - dedi ol videoda.
Sondai-aq, stýdent ýniversitette keibir pánder semestrdiń ortasynda qosylatynyn aitty.
"Bul jaǵdai birinshi ret bolyp otyrǵan joq. Oqytýshylardyń stýdenttermen qarym-qatynasy - taǵy bir másele. Keibir aýditoriialar jertólede ornalasqan, onda jeldetý qurylǵysy joq, demalatyn eshteńe joq. Dáris barysynda taqyrypty túsindirýge ýaqyt jetkiliksiz", - deidi stýdent.
Yessenov University stýdenti oqytýshylardyń keibir qylyqtaryna da shaǵymdandy.
"Deneshynyqtyrý páni oqytýshylarynyń stýdentterge qatygezdikpen qaraýy. Ásirese, er muǵalimder óz mindetterin elemei, stýdentterdi ádepsiz qimyldar jasaýǵa májbúr etedi", - dedi ol.
Sonymen qatar, úndeý avtorynyń sózinshe, bul ýaqytta olar qyzdardyń dene múshelerine qol tigizedi.
"Olardyń keibireýleri stýdentterden para suraidy. Sonymen qatar, dene shynyqtyrý pániniń muǵalimderi bizdiń oqýdan shyǵýymyzǵa sebep bolýy múmkin ekenin aityp qorqytady", - dedi ol óz úndeýinde.
Stýdenttiń sózinshe, fakýltet basshylary stýdentterdiń máselelerine qyzyǵýshylyq tanytpaidy.
Yessenov University baspasóz qyzmeti ókili video avtorynyń úndeýine pikir bildirdi.
"Bizge mundai shaǵymmen stýdent júginbedi. Qazir onyń qandai fakýltetten ekenin jáne bizdiń ýniversitettiń stýdenti me, joq pa, bilmeimiz. Biraq ishki tergeý bastaldy. Stýdentter arasynda saýalnama júrgiziledi", - dedi JOO baspasóz qyzmeti ókili lada.kz-ke jaýabynda.
Ýniversitettiń baspasóz qyzmeti ókilderi oqý ornynda ashyq ótinish júiesi bar ekenin jáne anonimdi shaǵym berýdiń kóptegen joly bar ekenin jetkizdi.
"Bizdiń ýniversitette sybailas jemqorlyqqa qarsy qyzmet, stýdenttik parlament, áleýmettik jeliler, rektor blogy, kýratorlar bar. Stýdent anonimdi túrde shaǵymdanyp, óz problemasyn aita alady", - dedi ol.
