اقتاۋدا شەنەۋنىكتەر ءبىر كيىز ءۇيدى 7 ميلليون تەڭگەدەن ساتىپ الماق بولعان. بارلىعى 12 كيىز ۇيگە تاپسىرىس بەرمەك بولىپتى. الايدا شەندىلەردىڭ بۇل رەتتە جولى بولمادى، - دەپ حابارلايدى Dalanews.kz "استانا" تەلەارناسىنا سىلتەپ.
الدىمەن الەۋمەتتىك جەلىدە مەملەكەتتىك ساتىپ الۋلار سايتىنان الىنعان بۇل دەرەك جىلدام تاراپ، قوعامنىڭ نارازىلىعىن تۋعىزدى. 12 كيىز ۇيگە اكىمدىك قىزمەتكەرلەرى 81 ملن تەڭگە جۇمساماق بولعان.
قاداعالاۋ ورگانىنىڭ قىزمەتكەرلەرى جەكەلەي زەرتتەۋ جۇرگىزىپ، مۇنداي تاۋاردى 6 ملن 750 مىڭ تەڭگەگە ەمەس، 1،5 - 2 ميلليون تەڭگەدەن دە ساتىپ الۋعا بولاتىنىن انىقتادى.
"ءبىزدىڭ ۇسىنىسىمىزدى قاراۋ ءۇشىن اكىمدىك قىزمەتكەرلەرىنە ءبىر اي ۋاقىت بەرىلدى، وسى مەرزىم وتكەننەن كەيىن ولار بىزگە كيىز ءۇي باعاسىن انىقتاعان ادامعا قاتىستى قانداي شارالار قابىلداعانى تۋرالى جازباشا جاۋاپ بەرۋگە مىندەتتى. ىس-ارەكەتتەر تارتىپتىك كوميسسيادا قارالادى. بىلايشا ايتقاندا، جاۋاپكەرگە قانداي جازا تاعايىندالاتىنىن قالا باسشىلىعى شەشەدى"، - دەدى اقتاۋ قالالىق پروكۋراتۋراسىنىڭ قوعامدىق مۇددەلەردى قورعاۋ ءبولىمىنىڭ پروكۋرورى البەرت ەسمۇرزايەۆ.
