1 ماۋسىمداعى جاعداي بويىنشا ءبىرىڭعاي جيناقتاۋشى زەينەتاقى قورىنىڭ شوتتارىندا 37 ميلليارد تەڭگەدەن استام قارجى سۇرالماي، يەسىز كۇيىندە تۇر. قور بۇل اقشانى كىمدەر الا الاتىنىن جانە ول ءۇشىن نە ىستەۋ كەرەكتىگىن ءتۇسىندىردى، دەپ حابارلايدى Dalanews.kz.

قانشا قارجى يەسىز قالدى؟

قور مالىمەتىنشە، زەينەتكەرلىك جاسقا جەتكەن، ءبىراق زەينەتاقىسىن راسىمدەمەگەن ازاماتتاردىڭ شوتتارىندا 37،3 ميلليارد تەڭگە ساقتاۋلى. بۇل قارجى 264 695 جەكە زەينەتاقى شوتىندا شوعىرلانعان. ولاردىڭ اراسىندا:

148 335 ادام قايتىس بولعان، ولاردىڭ جيناقتارىن مۇراگەرلەرى تالاپ ەتە الادى؛

59 800 ادام قازاقستاننان تىس جەرگە تۇراقتى تۇرۋعا كەتكەن؛

56 560 ادام زەينەتكەرلىك تولەمدەرىن الۋ ءۇشىن ءالى سون-عا جۇگىنبەگەن.

بۇل اقشا قايدا كەتىپ جاتىر؟

اتالعان قاراجات سالىمشىلاردىڭ جەكە زەينەتاقى شوتتارىندا ساقتالىپ، ينۆەستيسيالانۋدا. بۇل ارقىلى قوسىمشا تابىس تابۋ كوزدەلگەن. ينۆەستيسيالاۋمەن قازاقستان ۇلتتىق بانكى مەن جەكەمەنشىك ينۆەستيسيالىق پورتفەلدى باسقارۋشى كومپانيالار اينالىسادى.

جيناقتاردى قالاي الۋعا بولادى؟

ەگەر زەينەتكەر زەينەتاقى جيناعىن راسىمدەمەسە، وندا ول تۇرعىلىقتى جەرىندەگى «ازاماتتارعا ارنالعان ۇكىمەت» (سون) مەملەكەتتىك كورپوراسياسىنا جۇگىنۋى كەرەك.

قازاقستاننان تۇراقتى تۇرۋعا كەتكەن شەتەل ازاماتتارى مەن ازاماتتىعى جوق تۇلعالار دا ەنپف-تەن جيناقتارىن الا الادى. ول ءۇشىن زاڭناماعا سايكەس قۇجاتتار پاكەتىن ۇسىنۋ قاجەت.

قايتىس بولعان ادامنىڭ زەينەتاقى جيناقتارىنان ونىڭ تۋىستارىنا جەرلەۋگە ارنالعان ءبىر رەتتىك تولەم بەرىلەدى. ونىڭ مولشەرى سول جىلعا بەلگىلەنگەن 94 اەك-تەن اسپاۋى ءتيىس، ءارى شوتتاعى سوما كولەمىنەن ارتىق بولماۋى كەرەك.

مۇراگەرلىك قالاي راسىمدەلەدى؟

زەينەتاقى جيناقتارى قازاقستان زاڭناماسىنا سايكەس مۇراگەرلىك تارتىپپەن بەرىلەدى. قايتىس بولعاننان كەيىن 6 اي ىشىندە مۇراگەر نوتاريۋسقا جۇگىنىپ، زەينەتاقى جيناعىن يەلەنۋ قۇقىعىن راستايتىن مۇراگەرلىك تۋرالى كۋالىك الۋى ءتيىس.

ەگەر بۇل مەرزىم ءوتىپ كەتسە، مۇراگەر سوتقا جۇگىنىپ، مەرزىمدى قالپىنا كەلتىرۋ ارقىلى ءوز قۇقىعىن دالەلدەۋى قاجەت.

بجزق ماماندارى زەينەتاقى جيناعىن يەسىز قالدىرماي، دەر كەزىندە راسىمدەۋگە كەڭەس بەرەدى.