1 маусымдағы жағдай бойынша Бірыңғай жинақтаушы зейнетақы қорының шоттарында 37 миллиард теңгеден астам қаржы сұралмай, иесіз күйінде тұр. Қор бұл ақшаны кімдер ала алатынын және ол үшін не істеу керектігін түсіндірді, деп хабарлайды Dalanews.kz.

Қанша қаржы иесіз қалды?

Қор мәліметінше, зейнеткерлік жасқа жеткен, бірақ зейнетақысын рәсімдемеген азаматтардың шоттарында 37,3 миллиард теңге сақтаулы. Бұл қаржы 264 695 жеке зейнетақы шотында шоғырланған. Олардың арасында:

148 335 адам қайтыс болған, олардың жинақтарын мұрагерлері талап ете алады;

59 800 адам Қазақстаннан тыс жерге тұрақты тұруға кеткен;

56 560 адам зейнеткерлік төлемдерін алу үшін әлі ЦОН-ға жүгінбеген.

Бұл ақша қайда кетіп жатыр?

Аталған қаражат салымшылардың жеке зейнетақы шоттарында сақталып, инвестициялануда. Бұл арқылы қосымша табыс табу көзделген. Инвестициялаумен Қазақстан Ұлттық банкі мен жекеменшік инвестициялық портфельді басқарушы компаниялар айналысады.

Жинақтарды қалай алуға болады?

Егер зейнеткер зейнетақы жинағын рәсімдемесе, онда ол тұрғылықты жеріндегі «Азаматтарға арналған үкімет» (ЦОН) мемлекеттік корпорациясына жүгінуі керек.

Қазақстаннан тұрақты тұруға кеткен шетел азаматтары мен азаматтығы жоқ тұлғалар да ЕНПФ-тен жинақтарын ала алады. Ол үшін заңнамаға сәйкес құжаттар пакетін ұсыну қажет.

Қайтыс болған адамның зейнетақы жинақтарынан оның туыстарына жерлеуге арналған бір реттік төлем беріледі. Оның мөлшері сол жылға белгіленген 94 АЕК-тен аспауы тиіс, әрі шоттағы сома көлемінен артық болмауы керек.

Мұрагерлік қалай рәсімделеді?

Зейнетақы жинақтары Қазақстан заңнамасына сәйкес мұрагерлік тәртіппен беріледі. Қайтыс болғаннан кейін 6 ай ішінде мұрагер нотариусқа жүгініп, зейнетақы жинағын иелену құқығын растайтын мұрагерлік туралы куәлік алуы тиіс.

Егер бұл мерзім өтіп кетсе, мұрагер сотқа жүгініп, мерзімді қалпына келтіру арқылы өз құқығын дәлелдеуі қажет.

БЖЗҚ мамандары зейнетақы жинағын иесіз қалдырмай, дер кезінде рәсімдеуге кеңес береді.