ۇلتتىق بانك ءتوراعاسىنىڭ ورىنباسارى اسىلجان بايماعامبەتوۆ 2025 جىلعى 6 اقپاندا سەنات دالىزىندە جۋرناليستەرگە بەرگەن سۇقباتىندا ءماجىلىس دەپۋتاتىنىڭ اقشا باسىپ شىعاراتىن ستانوكتى قوسۋ تۋرالى ۇسىنىسىنا قاتىستى ءوز پىكىرىن ءبىلدىردى، دەپ جازادى Dalanews.kz.
ايتا كەتسەك، كەشە ءماجىلىس دەپۋتاتى سەرىك ەگىزبايەۆ ۇكىمەت پەن ۇلتتىق بانككە اقشا ماسساسىنىڭ ەميسسياسىن ۇلعايتۋ ءۇشىن باتىل جانە ەرەكشە شەشىم قابىلداۋدى ۇسىنعان ەدى. ونىڭ ايتۋىنشا، 2024 جىلدىڭ قورىتىندىسى بويىنشا اۋىلشارۋاشىلىعى سالاسىندا ءالى كۇنگە دەيىن 296 ملرد تەڭگەنىڭ سۋبسيديالارى تولەنبەگەن، ونى فەرمەرلەر قارىز الىپ جاپقان. ال 2025 جىلعا 110 ملرد تەڭگە سوماسىنا تاعى قوسىمشا قاجەتتىلىك بار.
"فەرمەرلەر ءوز وتىنىمدەرىنىڭ ورىندالۋىن 2 جىلعا دەيىن كۇتەدى. مەملەكەتتەن تولەمدەردىڭ كەشىگۋىنە بايلانىستى ولار ەكىنشى دەڭگەيدەگى بانكتەردىڭ قىمبات نەسيەلەرى ەسەبىنەن شىعىندارىن جابۋعا ءماجبۇر، بۇل ولاردىڭ قارجىلىق جاعدايىن ناشارلاتۋدا"، - دەپ اتاپ وتكەن دەپۋتات ۇكىمەت پەن ۇلتتىق بانككە "اقشا جوق" دەۋدىڭ ورنىنا اقشا باسىپ شىعاراتىن ستانوكتى ىسكە قوسۋدى ۇسىندى.
ۇلتتىق بانك وكىلى بۇل تىعىرىقتان شىعۋ امالى بولا المايتىنىن باسا اتاپ ءوتتى.
"اقشا باسىپ شىعارۋدا كەز كەلگەن جاعدايدا ينفلياسيا ودان سايىن زورايا تۇسەدى، بۇل كەدەيلەرگە سالىناتىن سالىق، ياعني ول حالىقتىڭ ەڭ وسال توبىنا قاتتى اسەر ەتەتىن بولادى. ياعني، ەڭبەك تابىسى قۇنسىزدانادى، ورتا تاپتىڭ بانكتەگى جيناقتارى قۇنسىزدانادى مۇندايدا. سوندىقتان بۇل ۇسىنىس... ءالى دە ويلانۋ كەرەك. بۇل تىعىرىقتان شىعۋدىڭ جولى ەمەس دەپ سانايمىن"، – دەدى اقىلجان بايماعامبەتوۆ.
بۇعان دەيىن ۇكىمەت ءوسىرۋدى ۇسىنعان قوسىمشا قۇن سالىعى اۋىلشارۋاشىلىعى سالاسىن قامتىماۋى مۇمكىن ەكەنى ايتىلعان. سونداي-اق ەگىس جۇمىستارىنا نەسيە بەرۋدە فەرمەرلەرگە قويىلاتىن تالاپتار قايتا قاراستىرىلعالى جاتقانىن دا حابارلانعان ەدىك.
