ۋكرايناعا قارسى سوعىس اشىپ الەم الدىندا ابىرويدان ايىرىلعان كرەمل بۇگىندە باتىس ەلدەرىنىڭ سالعان سانكسيالارىنىڭ زاردابىن تارتا باستادى. بۇگىن اقش-تىڭ ساۋدا ءمينيسترى دجين رايموندو رەسەيدىڭ قارۋ-جاراق ءوندىرىسى جاڭا قارۋ جاساپ شىعارۋ ءۇشىن توڭازتقىش پەن كىر جۋعىش ماشيناداعى چيپتەردى شىعارىپ الىپ، پايدالانعانىن ايتتى، – دەپ حابارلادى The Washington Post گازەتى.

باسىلىمنىڭ حابارلاۋىنشا، بۇل جايىنداعى اقپاراتتى اقش-تىڭ ساۋدا ءمينيسترى دجين رايموندو سەناتورلار الدىندا جاساعان بايانداماسىندا ايتقان.

– بىزگە ۋكرايندەر رەسەيدىڭ بۇزىلعان اسكەري تەحنيكالارىن مۇقيات قاراعاندا وعان توڭازتقىش پەن ىدىس-اياق جۋاتىن ماشينالاردىڭ چيپتەرىن قولدانعان بايقاعاندارىن ايتتى، – دەدى رايموندو. ساۋدا مينيسترلىگىنىڭ باسپا ءسوز حاتشىسى روبين پاتتەرسون مۇنداي اقپاراتتى ۋكرايندەر جەتكىزگەنىن راستادى.

اقش-تىڭ ساۋدا ءمينيسترىنىڭ ايتۋىنشا، سوعىس ءورتى تۇتانعالى بەرى امەريكانىڭ رەسەيگە تەحنولوگيانى ەكسپورتتاۋ كولەمى 70%-عا قىسقارعان. رەسمي ماسكەۋگە تەحنولوگيانى ەكسپورتتاۋ تاعى دا 30 ەل كۇرت توقتاتقانىن ەسكەرسەك، رەسەيدىڭ قارۋ-جاراق ءوندىرىسى اۋىر جاعدايمەن بەتپە-بەت كەلگەنىن بايقاۋعا بولادى.

دجين رايموندو سەناتتا جاساعان بايانداماسىندا بۇگىندە رەسەيدىڭ تانك قۇراستىراتىن ەكى بىردەي زاۋىتى سىرت ەلدەردەن تاسىمالداناتىن قوسالقى بولشەكتەردىڭ تاۋسىلۋىنا بايلانىستى جۇمىسىن توقتاتقانىن العا تارتقان. ولار – ورال ۆاگون جاساۋ زاۋىتى مەن چەليابى تاراكتور جاساۋ زاۋىتى ەكەنىن ەستەرىڭىزگە سالا كەتەمىز.