اقش سانكسياسى قازاقستاندىق كاسىپكەرلەردىڭ رەسەيدەگى جوباسىنا اسەر ەتتى، - دەپ حابارلايدى Dalanews.kz.

رەسەيدىڭ چۋكوت اۆتونوميالى وكرۋگىندە ورنالاسقان التىن-مىس كەن ورنى - بايم جوباسى KAZMinerals اكسيونەرلەرى ۆلاديمير كيم مەن ولەگ نوۆاچۋككە تيەسىلى. Nege.Aqsha مالىمەتىنشە، اقش سانكسيالار تىزىمىنە ەنگىزىلگەننەن كەيىن بۇل كەن ورنىنا ءقاۋىپ ءتوندى. ال بۇل دەگەنىمىز اقش-تاعى شوتتار بۇعاتتالاتىنىن جانە امەريكالىق رەزيدەنتتەرمەن ىنتىماقتاستىققا تىيىم سالىناتىنىن بىلدىرەدى.

"KAZMinerals بايم كەن ورنىن رومان ابراموۆيچتەن 5 جىل بۇرىن 900 ميلليون دوللارعا ساتىپ الدى جانە جوبانى دامىتۋعا 8 ميلليارد دوللار كولەمىندە قاراجات سالۋ جوسپارلانعان ەدى. الايدا كومپانيا وسى بانككە سالىنعان سانكسيالارعا بايلانىستى VTB بانكىنەن الىنعان 3،6 ميلليارد دوللارلىق نەسيەنى وتەي المادى، كەيىن جاعداي وزگەردى. بىلتىر كيم مەن نوۆاچۋك KAZMinerals-تى جوبادان شىعارۋعا ءماجبۇر بولدى، ونى جاڭادان تىركەلگەن Trianon Limited كومپانياسىنا اۋىستىردى"، - دەپ جازىلعان ارنا مالىمەتىندە.

ايتا كەتەيىك، بايم – اشىق تيپتەگى يگەرىلمەگەن ءىرى مىس الاڭدارىنىڭ ءبىرى. كەن قورى 9،5 ميلليون توننا مىس دەپ باعالانعان. كەندەگى مىستىڭ ۇلەسى 0،43 پايىز بولسا، ءار تونناسىنان 0،23 گرامم التىن الىنادى دەگەن بولجام بار. ياعني، 9،5 ميلليون توننا كەننەن 16،5 ميلليون ۋنسيا التىن يگەرىلەدى دەگەن ءسوز.

العاشقى 10 جىلدا بايم باۋرايىنان 250 مىڭ توننا مىس، 400 مىڭ ۋنسيا التىن الۋ جوسپارلانعان ەدى. قالعان كەندى 15 جىلدىڭ ىشىندە يگەرۋ كوزدەلگەن بولاتىن. وسىلايشا چۋكوت وڭىرىندە KAZ Minerals توبى كەمىندە 25 جىل جۇمىس ىستەيتىن جوسپار بولعان ەدى. 

"بايم جوباسىن ساتىپ الۋ - KAZ Minerals-تىڭ ترانفورماسياسىنداعى ماڭىزدى قادام. رەسەيدەگى بۇل جاڭا جوبانى يگەرۋ بىزگە سالاداعى كوشباسشىلىق ءوسىمدى جالعاستىرۋىمىزعا جاعداي جاسايدى. ءبىز بايم كەنىشىن يگەرىپ باستاعان تۇستا مىس تاپشىلىعى پايدا بولادى دەگەن بولجام بار" – دەگەن بولاتىن KAZ Minerals توبى ديرەكتورلار كەڭەسىنىڭ ءتوراعاسى ولەگ نوۆاچۋك بىرنەشە جىل بۇرىن.