حالىقارالىق ۆاليۋتا قورىنىڭ ەسەبى بويىنشا، اقش ەسەپ-شوتتارىندا اۋعان ورتالىق بانكىنە تيەسىلى 9 ملرد دوللار بار.

Wall Street Journal گازەتىنىڭ جازۋىنشا، دجو بايدەن اكىمشىلىگى وتكەن اپتادا اۋعانستاندا دوللارلار قولما-قول الىنىپ جاتقان كەزدە بۇعاتتاپ تاستاعان.

جاعداي وزگەرۋى مۇمكىن. ۆاشينگتون اۋعانستاننىڭ جاڭا بيلىگىن مويىنداۋى مۇمكىن. 1990 جىلدارى "تاليبان" قوزعالىسى اۋعانستاننىڭ باسىم بولىگىن بيلەگەن كەزدە، ونىڭ ۇكىمەتىن ءۇش ەل عانا مويىنداعان. اراسىندا اقش بولماعان.

اق ءۇيدىڭ ۇلتتىق قاۋىپسىزدىك بويىنشا كەڭەسشىسى دجەيك سالليۆان قازىرگى بيلىكتى مويىنداۋعا ءالى تىم ەرتە دەپ مالىمدەگەن. ول بۇل ماسەلە تالىپتەردىڭ وزدەرىنە بايلانىستى دەگەن.

حالىقارالىق قاۋىمداستىق مويىنداعان اۋعانستان پرەزيدەنتى اشراف عاني ەلىنەن قاشىپ كەتتى. ءقازىر ونىڭ ءبىرىنشى ۆيسە-پرەزيدەنتى امرۋللا سالەح زاڭدى مەملەكەت باسشىسىمىن دەپ مالىمدەدى.

ەۋروپالىق وداق تا ءقازىر اۋعانستانداعى جاعدايدى تەك باقىلاپ وتىر. ەۋرووداقتىڭ سىرتقى ساياسات جونىندەگى مەكەمەسىنىڭ باسشىسى جوزەپ بوررەل ەگەر تالىپتەر ادام قۇقىعىن سىيلاپ، اۋعان اۋماعىن تەرروريستەر ءۇشىن پايدالانبايتىن بولسا، ولارمەن جۇمىس ىستەۋگە دايىنبىز دەپ مالىمدەدى.

رەسەي سىرتقى ىستەر ءمينيسترى سەرگەي لاۆروۆ تا تالىپتەر بيلىگىن ازىرگە ءبىرجاقتى مويىندامايتىنىن جەتكىزدى. ءبىراق ماسكەۋ ءۇمىت ارتاتىنداي بەلگىلەر بايقاپ وتىرعانىن مالىمدەدى.

ال جۇڭگو اۋعانستاندا جاعداي رەتتەلسە، جاڭا بيلىكتى مويىنداۋىمىز مۇمكىن دەدى.

"تاليبان" قوزعالىسىنىڭ وكىلدەرى كابۋلدە العاشقى باسپا ءسوز ءماسليحاتىن وتكىزدى. وندا ولار وزدەرىنىڭ قارسىلاستارىن، امەريكالىق اسكەرمەن جۇمىس ىستەگەن ازاماتتاردى قۋدالاماۋعا ۋادە بەردى. تەرروريستىك توپتارمەن جانە ەسىرتكى تاسىمالداۋشىلارمەن كۇرەسەتىنىن، ايەلدەر قۇقىعىن "شاريعات زاڭىنا" سايكەس قورعايتىنىن جەتكىزدى.

تالىپتەر سونىمەن بىرگە رەسەي، جۇڭگو جانە پاكىستانمەن جاقسى قارىم-قاتىناستا ەكەنىن، بىردە-بىر ەلمەن قارسىلاسۋعا ۇمتىلمايتىنىن جەتكىزدى.

ازىرگە كابۋل اۋەجايىن اقش اسكەرى باقىلاپ تۇر. ولار باتىس ەلدەرىنىڭ ازاماتتارىن، ديپلوماتيالىق قىزمەتكەرلەردى شىعارۋدى جالعاستىرىپ جاتىر. وندا سونىمەن بىرگە ەلدەن شىعىپ كەتۋگە اسىققان مىڭداعان اۋعان تۇرعىنى دا ءجۇر.