بٷگٸن سەناتتىڭ جالپى وتىرىسىندا اقمارال ەلنازاروۆانىڭ دەپۋتاتتىق ٶكٸلەتتٸگٸ توقتاتىلدى, دەپ حابارلايدى Dalanews.kz.
قر ورتالىق سايلاۋ كوميسسيياسىنىڭ مٷشەسٸ شاۆحات ٶتەمٸسوۆ اقمارال ەلنازاروۆانىڭ باسقا قىزمەتكە اۋىسۋىنا وراي ونىڭ دەپۋتاتتىق ٶكٸلەتتٸگٸن مەرزٸمٸنەن بۇرىن توقتاتۋ تۋرالى ۇسىنىمدى جارييالادى.
پالاتا وتىرىسىندا سەناتورلار دەپۋتاتتىڭ ٶكٸلەتتٸگٸن توقتاتۋ جٶنٸندەگٸ قاۋلى قابىلدادى.
بۇدان بۇرىن حابارلانعانداي, جاقىندا مەملەكەت باسشىسىنىڭ جارلىعىمەن اقمارال شەرٸپبايقىزى ەلنازاروۆا قازاقستان رەسپۋبليكاسىنىڭ دەنساۋلىق ساقتاۋ مينيسترٸ لاۋازىمىنا تاعايىندالدى.
اقمارال شەرٸپبايقىزى 1971 جىلى قىزىلوردا قالاسىندا تۋعان.
الماتى مەملەكەتتٸك مەديتسينا ينستيتۋتىن (1994) «پەدياترييا», قورقىت ۋنيۆەرسيتەتٸن (2006) «ەكونوميست» ماماندىعى بويىنشا بٸتٸرگەن.
قازاقستاندا دا, شەتەلدە دە قوسىمشا وقۋدان ٶتتٸ. مەديتسينا عىلىمدارىنىڭ دوكتورى.
