اقش ۇلتتىق قاۋىپسىزدىك بويىنشا كەڭەسشى مايك ۋولتس كەزدەيسوق The Atlantic جۋرنالىنىڭ باس رەداكتورى دجەففري گولدبەرگتى چاتقا قوسىپ جىبەرگەن. بۇل چاتتا يەمەندەگى حۋسيتتەرگە قارسى اسكەري وپەراسيا جوسپارى تالقىلانعان، دەپ حابارلايدى Dalanews.kz.
بۇل جاعداي تەك باق-تىڭ نازارىن اۋدارتىپ قانا قويماي، كونگرەسس مۇشەلەرى مەن ساياسي قارسىلاستاردىڭ سىنىن تۋدىردى.
كۇتپەگەن شاقىرۋ
11 ناۋرىزدا گولدبەرگ Signal مەسسەندجەرىندە "مايك ۋولتس" دەگەن پايدالانۋشىدان شاقىرۋ الىپ، بىردەن "Houthi PC small group" دەپ اتالاتىن چاتقا قوسىلعان. چاتتا اقش ۇلتتىق قاۋىپسىزدىك كەڭەسىنىڭ جوعارى لاۋازىمدى وكىلدەرى — قورعانىس ءمينيسترى پيت حەگسەت، ۆيسە-پرەزيدەنت دجەي دي ۆەنس جانە ۇلتتىق بارلاۋ ديرەكتورى تۋلسي گاببارد سياقتى تۇلعالار بولعان.
كونگرەسس پەن قوعامنىڭ رەاكسياسى
كونگرەسس بۇل وقيعاعا الاڭداۋشىلىق ءبىلدىردى. پالاتا وكىلدەرى دون بەيكون بۇل قۇپيا مالىمەتتەردى قورعالماعان ارنالار ارقىلى تاراتۋ "كەشىرىلمەيتىن قاتەلىك" ەكەنىن ايتتى، ال سەناتور رودجەر ۋيكەر قارۋلى كۇشتەر كوميتەتى تەرگەۋ جۇرگىزەتىنىن مالىمدەدى. بۇل جاعداي سونداي-اق رەسپۋبليكالىق پارتياداعى يزولياسيونيستەر تاراپىنان ۋولتسقا دەگەن سىنعا سەبەپ بولدى، ولار ونى نەوكونسەرۆاتورلارمەن بايلانىسى بار دەپ كۇدىكتەنەدى.
وتستاۆكا ماسەلەسى
اكىمشىلىكتەگى پىكىرلەر ەكىگە ءبولىندى. كەيبىر جوعارى لاۋازىمدى شەنەۋنىكتەر ۋولتستىڭ پرەزيدەنتتى "قاتەرگە ۇشىراتپاۋ" ءۇشىن قىزمەتىنەن كەتۋى كەرەك دەپ سانايدى. الايدا اق ءۇي ونىڭ جۇمىسىن قولداپ وتىر. باسپا ءسوز حاتشىسى كارولين ليەۆيتت "پرەزيدەنت ترامپ ۇلتتىق قاۋىپسىزدىك بويىنشا ءوزىنىڭ كومانداسىنا، ونىڭ ىشىندە مايك ۋولتسقا تولىق سەنەدى" دەپ مالىمدەدى. دەگەنمەن، كەيبىر دەرەككوزدەر ترامپ بۇل جاعدايدى ساياساتقا ءقاۋىپ توندىرەدى دەپ تاپسا، ءوزىنىڭ كوزقاراسىن وزگەرتۋى مۇمكىن دەپ وتىر.
قىسىم مەن سىني پىكىرلەرگە قاراماستان، ۋولتس ءالى دە ءوز قىزمەتىندە. ءبىراق ونىڭ بولاشاق تاعدىرى پرەزيدەنتتىڭ شەشىمىنە بايلانىستى بولادى. اق ءۇي قوعامدىق رەاكسيانى باقىلاپ، سوڭعى شەشىمدى قابىلدايدى.
