دەپۋتات نارتاي ارالباي ۇلى ەلدى ابىگەرگە سالعان سۋ تاسقىنىنا بايلانىستى پىكىر ءبىلدىرىپ، تابيعي اپاتقا جول بەرگەن شەنەۋنىكتەرگە ءتيىستى شارا قولدانىلۋى كەرەك ەكەنىن جەتكىزدى، دەپ حابارلايدى Dalanews.kz.
ونىڭ پىكىرىنشە، مەملەكەت ماسەلەنىڭ ءالى دە سالدارىمەن كۇرەسىپ كەلەدى.
"ءدال وسى سۋ باسۋ جۇمىستارىنا، توپان سۋ اپاتىنا نەمقۇرايلى قاراعان ءارى الدىن الا ارەكەت جاساماعان شەنەۋنىكتەردىڭ ارەكەتىنە قۇقىقتىق باعا بەرىلۋى كەرەك. ءبىز ىلعي سالدارىمەن كۇرەسەمىز. سەبەبىمەن كۇرسەۋ دەگەندى ۇمىتقالى قاشان؟ سوندىقتان وسى سالدارى اقىرىنداپ قايتقاننان كەيىن ءتيىستى شارالار قابىلدانادى دەپ ويلايمىن. سونىمەن قاتار قۇزىرەتى بار ورگاندار جەرگىلىكتى اكىمدەر مەن مينيسترلەردىڭ تاعايىنداۋىنا، ولاردى ورنىنان الىپ تاستاۋ بويىنشا ءدال وسىلاي ارەكەت ەتەدى دەپ ويلايمىن"، - دەدى دەپۋتات.
ايتا كەتەيىك، دەپۋتات بۇعان دەيىن باتىس قازاقستان وبلىسىنداعى سۋ باسقان ايماقتاردى ارالاپ، حالىقتىڭ جاي-كۇيىن الەۋمەتتىك جەلىدەگى پاراقشاسىندا بولىسكەن ەدى.
"باتىس قازاقستان وبلىسىنا تابانىم تيىسىمەن تىكۇشاقپەن وبلىستىڭ سۋ باسقان اۋداندارىنا، شالعاي ورتالىقتارىنا بارىپ كەلدىك.
692000 ادام تۇراتىن باتىس قازاقستاننىڭ سۋ باسقان ايماقتارىنداعى قاتىستى احۋال قيىن. كۇن ساناپ جاعداي كۇردەلەنىپ بارادى.
ءقازىردىڭ وزىندە وبلىستا 455 ءۇيدى سۋ باسقان، 22 عيمارات سۋ استىندا قالعان.
قاردىڭ ەرۋى جانە جاۋىن-شاشىننىڭ سالدارىنان 17 الەۋمەتتىك جانە مەملەكەتتىك ماڭىزى بار نىساننىڭ (ورال ق. – 13، بايتەرەك اۋد. – 2، تەرەكتى اۋد. – 2) جانە 5 كوپ قاباتتى تۇرعىن ءۇيدىڭ (ورال ق.) جەرتولەسىن، سونداي-اق 460 جەكە تۇرعىن ءۇيدى جانە 99 تۇرعىن ءۇيدىڭ اۋلاسىن سۋ باسقان.
ءقازىر باتىس قازاقستان وبلىسىنىڭ ورتالىعى ورال قالاسى مەن 4 اۋدانىندا (قاراتوبە، سىرىم، ءبورلى، تەرەكتى) توتەنشە جاعداي جاريالاندى.
حالىق قاتتى ۇرەيلەنىپ قالعان"، - دەپ جازبا جاريالاعان بولاتىن.
وسى تۇستا ءماجىلىس دەپۋتاتى ماقسات تولىقباي دا توتەنشە جاعدايعا بايلانىستى ءوز ويىن ورتاعا سالعان ەدى.
دەپۋتاتتىڭ سوزىنشە، اكىمدىكتەردە ەشقانداي دايىندىق جوق. بۇل - ۇكىمەت پەن اكىمدىكتەر اراسىندا بايلانىس جوق ەكەنىنىڭ بەلگىسى. ماقسات تولىقباي بۇل جاعدايعا كىنالى رەتىندە رومان سكلياردى اتادى.
"تامىرىنان قۇرتتاعان اعاش بۇتاعىنان ەمدەلمەيدى. رومان سكلياردان باستاپ ۇكىمەتتىڭ كەيبىر مۇشەلەرىن اۋىستىراتىن كەز كەلدى.
ايماقتاردى ارالاپ، اقتوبەنىڭ ورتاسىنا شەتتىك. ءبىراق، ءقادىرلى اعايىن، شىنىن ايتۋ كەرەك، اكىمدىكتەردىڭ دايىندىعى وتە ناشار. ءتىپتى باسقاسىن ايتپاعاندا، كەيبىر اۋدان اكىمدەرىنىڭ رەزەرۆىندە نە قايىق جوق، سۋ ەتىك تابىلماي جاتىر. اكىمدىك پەن ۇكىمەتتىڭ اراسىندا بايلانىس جوقتىڭ قاسى دەسەك بولادى.
بۇعان ءبىرىنشى كەزەكتە كىم جاۋاپتى؟ اشىعىن ايتۋ كەرەك، پرەمەر-مينيستردىڭ ورىنباسارى رومان سكليار جاۋاپتى. كەشە اقتوبەگە كەلدى. العا دەيتىن ءبىر اۋدانعا باردى، ءبىراق سۋدىڭ استىندا قالعان ويىلعا نەگە بارمايدى؟
مۇنىڭ الدىندا الاپات ءورت بولعانىن بىلەسىزدەر. قانشاما ادام ورتەنىپ كەتتى. بۇعان دا كىم جاۋاپتى؟ رومان سكليار جاۋاپتى. سوگىسپەن قۇتىلدى.
سوندىقتان بۇل وزگەلەرگە ساباق بولۋى ءۇشىن پرەزيدەنت سوگىس جاريالاپ جاتىر. ءبىراق رومان سكلياردان باستاپ ۇكىمەتتىڭ كەيبىر مۇشەلەرىنە شارا قولدانىپ، اۋىستىراتىن كەز كەلدى عوي دەپ ويلايمىن"، - دەدى دەپۋتات.
