قىزىلوردادا 1 ميلليون تەڭگە كولەمىندە پارا بەرمەك بولعان “ىبىراي مولدا” مەشىتىنىڭ يمامى تالعات نۇرمان جۇمىسىنان بوساتىلدى، دەپ حابارلايدى Dalanews.kz.

ول سىبايلاس جەمقورلىق قىلمىسىن جاساعانى ءۇشىن كىنالى دەپ تانىلىپ، قمدب-نىڭ بۇيرىعىمەن قىزمەتىنەن كەتتى.

“سوت ونى سىبايلاس جەمقورلىق قىلمىسى ءۇشىن كىنالى دەپ تانىپ، اقتالمايتىن نەگىزدەر بويىنشا قىلمىستىق جاۋاپكەرشىلىكتەن بوساتىلۋىنا بايلانىستى جۇمىستان كەتتى. نۇرماننىڭ قمدب جۇيەسىنەن بوساتىلعاننان كەيىنگى جۇمىس ورنى مەن قىزمەتى تۋرالى ناقتى اقپارات جوق"، – دەپ جاۋاپ بەردى قمدب Nege.Asha اگەنتتىگىنە.

ەسكە سالايىق، تامىز ايىندا مەشىتتىڭ بۇرىنعى يمامى تالعات نۇرمان مەن سىبايلاس جەمقورلىققا قارسى ءىس-قيمىل اگەنتتىگىنىڭ قىزمەتكەرى سەرىك ءابىلقايىروۆ جەمقورلىق ءۇشىن سوتتالعان ەدى.

ءابىلقايىروۆ تۋىسىنىڭ سەنىمىن پايدالانىپ، يمامعا دەسترۋكتيۆتى ءدىني اعىمدارمەن بايلانىسى بار دەگەن كۇدىكپەن تەكسەرىس جۇرگىزىلەيىن دەپ جاتقانىن ايتقان.

ال كۇدىكتىڭ تۋىنداۋىنا يمامنىڭ ەكى ايەلمەن تۇرۋى سەبەپ بولعانىن جەتكىزگەن. بۇل ونىڭ كىرىس كوزدەرىنە قاتىستى سۇراقتار تۋىنداتقان.

مۇمكىن بولاتىن زارداپتاردان قورىققان تالعات نۇرمان 2 ميلليون تەڭگە بەرۋ تۋرالى تالاپقا كەلىسىپ، 1 ميلليون تەڭگە نەسيە الىپ، اقشانى ءابىلقايىروۆقا ۇستاتقان. الايدا كەيىن الداۋدىڭ قۇربانى بولعانىن تۇسىنگەن سوڭ قۇقىق قورعاۋ ورگاندارىنا جۇگىنگەن. وسىدان كەيىن ءابىلقايىروۆ اقشانى قايتارىپ بەرگەن.

شىن مانىندە يمامعا قاتىستى ەشقانداي تەكسەرىس جوسپارلانباعانى جانە ءابىلقايىروۆتىڭ جەكە مۇددەلەرىن كوزدەگەنى انىقتالدى. سوت ونى الاياقتىق جاساعانى ءۇشىن 20 ميلليون تەڭگە ايىپپۇلمەن جازالادى. نۇرمانعا قاتىستى پارا بەرۋ ارەكەتى ءۇشىن كىنا تاعىلىپ، ءبىراق ول ءوز ەركىمەن قۇقىق قورعاۋ ورگاندارىنا جۇگىنىپ، كىناسىن مويىنداعاندىقتان قىلمىستىق جاۋاپكەرشىلىكتەن بوساتىلدى.