Qyzylordada 1 million teńge kóleminde para bermek bolǵan “Ybyrai molda” meshitiniń imamy Talǵat Nurman jumysynan bosatyldy, dep habarlaidy Dalanews.kz.
Ol sybailas jemqorlyq qylmysyn jasaǵany úshin kináli dep tanylyp, QMDB-nyń buiryǵymen qyzmetinen ketti.
“Sot ony sybailas jemqorlyq qylmysy úshin kináli dep tanyp, aqtalmaityn negizder boiynsha qylmystyq jaýapkershilikten bosatylýyna bailanysty jumystan ketti. Nurmannyń QMDB júiesinen bosatylǵannan keiingi jumys orny men qyzmeti týraly naqty aqparat joq", – dep jaýap berdi QMDB Nege.Asha agenttigine.
Eske salaiyq, tamyz aiynda meshittiń burynǵy imamy Talǵat Nurman men sybailas jemqorlyqqa qarsy is-qimyl agenttiginiń qyzmetkeri Serik Ábilqaiyrov jemqorlyq úshin sottalǵan edi.
Ábilqaiyrov týysynyń senimin paidalanyp, imamǵa destrýktivti dini aǵymdarmen bailanysy bar degen kúdikpen tekseris júrgizileiin dep jatqanyn aitqan.
Al kúdiktiń týyndaýyna imamnyń eki áielmen turýy sebep bolǵanyn jetkizgen. Bul onyń kiris kózderine qatysty suraqtar týyndatqan.
Múmkin bolatyn zardaptardan qoryqqan Talǵat Nurman 2 million teńge berý týraly talapqa kelisip, 1 million teńge nesie alyp, aqshany Ábilqaiyrovqa ustatqan. Alaida keiin aldaýdyń qurbany bolǵanyn túsingen soń quqyq qorǵaý organdaryna júgingen. Osydan keiin Ábilqaiyrov aqshany qaitaryp bergen.
Shyn máninde imamǵa qatysty eshqandai tekseris josparlanbaǵany jáne Ábilqaiyrovtyń jeke múddelerin kózdegeni anyqtaldy. Sot ony alaiaqtyq jasaǵany úshin 20 million teńge aiyppulmen jazalady. Nurmanǵa qatysty para berý áreketi úshin kiná taǵylyp, biraq ol óz erkimen quqyq qorǵaý organdaryna júginip, kinásin moiyndaǵandyqtan qylmystyq jaýapkershilikten bosatyldy.
