قىزىلوردا قالالىق پوليسيا باسقارماسى جەدەل باسقارۋ ورتالىعىنىڭ بەينەكامەراسى قالاداعى ورتالىق كوشەلەردىڭ بىرىندە اۆتوكولىك يەسىنىڭ جول ەرەجەسىن بۇزعانىن انىقتادى.
بۇل بويىنشا پوليسەيلەرگە باعىت-باعدار بەرىلىپ، كولىك توقتاتىلدى. «پاترۋلدىك پوليسيا قىزمەتكەرلەرى كولىك يەسىن توقتاتقان ساتتە جۇرگىزۋشى ءوزىن «انتيكوردىڭ قىزمەتكەرىمىن» دەپ تانىستىرىپ، قىزمەتتىك كۋالىگىن ۇسىنعان. تەكسەرۋ بارىسىندا قىزمەتتىك كۋالىكتىڭ جالعان ەكەندىگى انىقتالدى. ايعاقتى زاتتار الىندى. اتالعان دەرەك بويىنشا ق ر قىلمىستىق كودەكسىنىڭ 385-بابىنىڭ 3-بولىگىمەن تەرگەۋ ءجۇرىپ جاتىر. كۇدىكتىگە قاتىستى ەشقايدا كەتپەۋ جانە ءتيىستى مىنەز-قۇلىق تۋرالى قولحات تۇرىندە بۇلتارتپاۋ شاراسى تاڭدالدى. پوليسەيلەر وقيعانىڭ ءمان-جايىن انىقتاۋدا» دەپ ءمالىم ەتتى باسقارمادان.
ۆەدومستۆو مالىمەتىنشە، اتالعان جۇرگىزۋشىگە قاتىستى ق ر اكىمشىلىك قۇقىق بۇزۋشىلىق تۋرالى كودەكسىنىڭ 593-بابىنىڭ 2-بولىگى بويىنشا اكىمشىلىك حاتتاما تولتىرىلعان.
