تۇركيالىق بيزنەسمەندەردىڭ وڭىرىمىزگە ءىسساپارىنىڭ ماقساتى اۋىل شارۋاشىلىعىنداعى جاڭا تەحنولوگيالارعا ينۆەستيسيالار تارتۋ، وسى سالاداعى ورتا جانە شاعىن بيزنەستى دامىتۋ بولىپ تابىلادى.
ءوڭىردىڭ الەۋمەتتىك-ەكونوميكالىق احۋالىمەن تانىسىپ، الەۋەتىن باعامداۋعا كەلگەن دەلەگاسيا مۇشەلەرى شىمكەنتتەگى ارنايى ەكونوميكالىق ايماق پەن يندۋستريالدى ايماقتىڭ جۇمىسىمەن تانىسىپ، ونداعى كاسىپورىنداردى ارالادى. ءوڭىردىڭ ەكونوميكالىق الەۋەتىمەن تانىسقان تۇرىك كاسىپكەرلەرى ايماقتاعى اتقارىلىپ جاتقان جۇمىستاردى وڭ باعالاپ، بولاشاقتا بىرلەسە جۇمىس ىستەۋگە نيەتتى ەكەندىكتەرىن جەتكىزدى.
ەسكە سالايىق، 15 اقپاندا وڭتۇستىكقازاقستاندىق كاسىپكەرلەر تۇركياعا جۇمىس ساپارىمەن بارىپ، انتاليا پروۆينسياسىنىڭ كاسىپكەرلەر قاۋىمداستىعىنىڭ وكىلدەرىمەن كەزدەسۋ وتكىزگەن بولاتىن. وندا تۇركيانىڭ 12 كومپانياسىمەن ءبىزدىڭ بيزنەسمەندەر جيھاز جاساۋ، كەڭ قولدانىستاعى قاپتاۋ ونىمدەرىنىڭ ءوندىرىسى، كەپتىرىلگەن جەمىستەر جانە ازىق-تۇلىككە ارنالعان قاپتاما ءونىمىنىڭ ءوندىرىسى، جىلىجايعا ارنالعان جابدىقتاردى ءوندىرۋ جانە ورناتۋ، پوليپروپيلەن ونىمدەرىن ءوندىرۋ، تىڭايتقىشتار ءوندىرىسى، ترانسفورماتورلار قۇراستىرۋ، شىنى پلاستيكالىق ونىمدەردى ءوندىرۋ، ساندىك گۇل كوشەتتەرىنىڭ ءوندىرىسى اياسىندا پىكىر الماسىپ، وتىرىسقا قاتىسۋشىلارعا مەملەكەتتىك قولداۋ جانە وقو ەكونوميكا سەكتورىنىڭ بارلىق سالالارىنداعى ينۆەستيسيالىق تارتىمدىلىعى تۋرالى تولىق اقپارات بەرىلگەن-دى.
ناتيجەسىندە، تۇركيالىق ءۇش كومپانيامەن - «Çitello» (كەپتىرىلگەن جەمىستەر جانە ازىق-تۇلىككە ارنالعان قاپتاما ءونىمىنىڭ ءوندىرىسى)، «SiMGETEK A.S.» (جىلىجايعا ارنالعان جابدىقتاردى ءوندىرۋ جانە ورناتۋ) جانە «CUBO» (قۇرعاق قۇرىلىس قوسپالارىن جانە بوياۋ ونىمدەرىن ءوندىرىسى) كومپانيالارىمەن وڭتۇستىك قازاقستان وبلىسىندا بىرلەسكەن جوبالاردى جۇزەگە اسىرۋ تۋرالى كەلىسىمگە قول جەتكىزىلدى.
تۇرىك كاسىپكەرلەرىنىڭ وڭتۇستىككە ساپارى اياسىندا 30 ناۋرىز كۇنى جەرگىلىكتى كاسىپكەرلەرمەن B2B كەزدەسۋلەر وتكىزۋ جوسپارلانىپ جاتىر.
وقو اكىمىنىڭ باسپا ءسوز قىزمەتى
