استانا قالالىق ەسىل اۋدانىنىڭ سوتى ونى جەتى جىلعا قاماۋ تۋرالى ۇكىم شىعارعان 2014 جىلدان بەرى انار مەشىمبايەۆا تۇزەتۋ كولونياسىندا ءوزىن تەك جاقسى قىرىنان كورسەتىپ، ءتىپتى، ءتورت رەت ماراپاتتالعان ەكەن.
«قازاقپارات» اگەنتتىگىنىڭ رەسمي ساۋالىنا جاۋاپ بەرە وتىرىپ، الماتى وبلىسى بويىنشا قىلمىستىق اتقارۋ جۇيەسى دەپارتامەنتى باسشىسىنىڭ ورىنباسارى، ادىلەت پولكوۆنيگى بالابەك ءجۇنىسوۆ انار مەشىمبايەۆانىڭ كولونياداعى ءومىرى تۋرالى بىرەر اقپارات بەردى.
– مەكەمە اكىمشىلىگى ا. مەشىمبايەۆانىڭ اتىنان 2016 جىلدىڭ 13 مامىرى مەن 29 مامىرىندا سوتقا شارتتى تۇردە ەرتە بوساتۋ تۋرالى ماتەريال جىبەردى. ءبىراق، الماتى وبلىسى ىلە اۋدانىنىڭ سوتى شارتتى تۇردە ەرتە بوساتۋ تۋرالى ءوتىنىشتى قاناعاتتاندىرعان جوق، – دەلىنگەن «قازاقپاراتقا» جىبەرىلگەن جاۋاپتا.
رەسمي جاۋاپتان بىلگەنىمىز، ا.مەشىمبايەۆا الماتى وبلىسىنداعى قىلمىستىق اتقارۋ جۇيەسى دەپارتامەنتىنىڭ لا-155/4 مەكەمەسىنە 2014 جىلدىڭ 24 مامىرىندا جەتكىزىلگەن ەكەن. ق ر قىلمىستىق اتقارۋ كودەكسىنىڭ 116 بابىنا سايكەس، مەكەمەنىڭ كوميسسياسى 2014 جىلدىڭ 2 جەلتوقسانىنان بەرى ا.مەشىمبايەۆاعا قاتىستى قاماۋ شارتىن جەڭىلدەتكەن. 2016 جىلدىڭ ساۋىرىنەن بەرى ا.مەشىمبايەۆا كولونيانىڭ تاربيە وتريادىنا ستارشينا بولىپ ءجۇر ەكەن.
– مەكەمەنىڭ اۋلاسىن اباتتاندىرۋ جۇمىسىنا، وتريادتىڭ مادەني-تۇرمىستىق جاعدايىن جاقسارتۋ جۇمىستارىنا ءوز ەركىمەن قاتىسادى. ءارتۇرلى قوعامدىق جۇمىستاردى دا اتقارادى. مادەني شارالاردى ۇيىمداستىرۋعا ات سالىسادى. كولونياداعى ءتارتىپ پەن جازاسىن وتەپ جاتقان قازىرگى جاعدايعا شاعىم ايتپايدى. كولونيانىڭ ىشكى تارتىپتەرىن ساقتايدى، – دەلىنگەن بىزگە جىبەرىلگەن جاۋاپتا.
جوعارىدا حابارلاعانىمىزداي، ا.مەشىمبايەۆا كولونيادا ءتورت رەت ماراپاتتالعان. وعان قاتىستى ەسكەرتۋلەر جوق.
ا.مەشىمبايەۆا الماتى وبلىسى جاۋعاشتى كەنتىندە ورنالاسقان لا-155/4 قاماۋ مەكەمەسىندە جازاسىن وتەپ جاتىر.
اۆتور: كەنجەكەي توقتامۇرات قىزى
