Anar Meshimbaeva koloniiada tárbie otriadynyń starshinasy bolyp júr
Astana qalalyq Esil aýdanynyń soty ony jeti jylǵa qamaý týraly úkim shyǵarǵan 2014 jyldan beri Anar Meshimbaeva túzetý koloniiasynda ózin tek jaqsy qyrynan kórsetip, tipti, tórt ret marapattalǵan eken.
«QazAqparat» agenttiginiń resmi saýalyna jaýap bere otyryp, Almaty oblysy boiynsha Qylmystyq atqarý júiesi departamenti basshysynyń orynbasary, ádilet polkovnigi Balabek Júnisov Anar Meshimbaevanyń koloniiadaǵy ómiri týraly birer aqparat berdi.
– Mekeme ákimshiligi A. Meshimbaevanyń atynan 2016 jyldyń 13 mamyry men 29 mamyrynda sotqa shartty túrde erte bosatý týraly material jiberdi. Biraq, Almaty oblysy Ile aýdanynyń soty shartty túrde erte bosatý týraly ótinishti qanaǵattandyrǵan joq, – delingen «QazAqparatqa» jiberilgen jaýapta.
Resmi jaýaptan bilgenimiz, A.Meshimbaeva Almaty oblysyndaǵy qylmystyq atqarý júiesi departamentiniń LA-155/4 mekemesine 2014 jyldyń 24 mamyrynda jetkizilgen eken. QR Qylmystyq atqarý kodeksiniń 116 babyna sáikes, mekemeniń komissiiasy 2014 jyldyń 2 jeltoqsanynan beri A.Meshimbaevaǵa qatysty qamaý shartyn jeńildetken. 2016 jyldyń sáýirinen beri A.Meshimbaeva koloniianyń tárbie otriadyna starshina bolyp júr eken.
– Mekemeniń aýlasyn abattandyrý jumysyna, otriadtyń mádeni-turmystyq jaǵdaiyn jaqsartý jumystaryna óz erkimen qatysady. Ártúrli qoǵamdyq jumystardy da atqarady. Mádeni sharalardy uiymdastyrýǵa at salysady. Koloniiadaǵy tártip pen jazasyn ótep jatqan qazirgi jaǵdaiǵa shaǵym aitpaidy. Koloniianyń ishki tártipterin saqtaidy, – delingen bizge jiberilgen jaýapta.
Joǵaryda habarlaǵanymyzdai, A.Meshimbaeva koloniiada tórt ret marapattalǵan. Oǵan qatysty eskertýler joq.
A.Meshimbaeva Almaty oblysy Jaýǵashty kentinde ornalasqan LA-155/4 qamaý mekemesinde jazasyn ótep jatyr.
Avtor: Kenjekei Toqtamuratqyzy
