ەلىمىزدە انا مەن بالانىڭ دەنساۋلىعىن قورعاۋعا باعىتتالعان ءىس-شارالار مەن باعدارلامالار ماڭىزدى مەملەكەتتىك مىندەتتەردىڭ ءبىرى بولىپ تابىلادى. بۇل باعىتتا تاۋەلسىزدىك جىلدارى كوپتەگەن جۇمىستار اتقارىلدى. انا مەن بالانىڭ دەنساۋلىعى بولاشاق ۇرپاقتىڭ دەنساۋلىعى مەن ءومىر ساپاسىنا تىكەلەي اسەر ەتەتىن كورسەتكىش دەسەك بولادى. سوندىقتان انا مەن بالانىڭ دەنساۋىلعىن جاقسارتۋعا قاتىستى جۇمىستار توقتاۋسىز ءجۇرۋى ءتيىس.
ءقازىر ەل اۋماعىندا جۇكتى ايەلدەرگە ارنالعان مەديسينالىق قىزمەتتەردى جاقسارتۋ ماقساتىندا، پەرزەنتحانالار مەن بوسانۋ ورتالىقتارىن دامىتۋ جۇمىستارى قارقىندى جۇرۋدە. ورتالىقتاردى زاماناۋي جابدىقتارمەن قامتاماسىز ەتۋ، بىلىكتى مامانداردى تارتۋ جانە جۇكتى ايەلدەرگە ساپالى قىزمەت كورسەتۋ – باستى نازاردا.
سونىمەن قاتار، بوسانۋ كەزىندە اسقىنۋلاردى ازايتۋ ماقساتىندا جاڭا تەحنولوگيالار ەنگىزىلىپ، الدىن الۋ شارالارى جۇرگىزىلەدى.
Dalanews.kz اقپارات اگەنتتىگى تىلشىسىنە ق ر دسم انا مەن بالا دەنساۋلىعىن ساقتاۋ دەپارتامەنتىنىڭ ديرەكتورى ماعريپا ەمبەرگەنوۆا ەلىمىزدە انا مەن بالانىڭ دەنسالىعىن جاقسارتۋعا باعىتتالعان مەديسينالىق ينفراقۇرىلىم جايىندا قىسقاشا بايانداپ بەرگەن بولاتىن.
– دەنساۋلىق ساقتاۋ مينيسترلىگى حالىقارالىق ستاندارتتارعا سۇيەنىپ، انا مەن بالاعا كورسەتىلەتىن مەديسينالىق قىزمەتتىڭ ساپاسى مەن قولجەتىمدىلىگىن قامتاماسىز ەتىپ كەلەدى. بۇل باعىتتاعى جۇمىستىڭ تيىمدىلىگىن ارتتىۋ ءىسى دە مينيسترلىكتىڭ ءجىتى نازارىندا ەكەنىن ايتقىم كەلەدى.
قازىرگى تاڭدا ەلىمىزدەگى ايەل ادامداردىڭ سانى 10،2 ميللوندى قۇراسا، بالانىڭ سانى 6،8 ميلليونعا جەتىپ وتىر. سول سياقتى ەلىمىزدە جىل سايىن ورتا ەسەپپەن 400 مىڭنان استام انا ومىرگە ءسابي اكەلىپ، حالىق سانىنىڭ ارتتىرۋىن ءوز ۇلەستەرىن قوسىپ كەلەدى.
قازاقستان ءوزىنىڭ تاۋەلسىزدىگىن العان كۇننەن باستاپ انا مەن بالانىڭ دەنساۋلىعىن نىعايتۋعا باسا كوڭىل ءبولىپ، بۇل باعىتتا ءتيىستى زاڭنامالار مەن قۇىقتىق اكتىلەردى قابىلدادى. وسى جىلدار ىشىندە قازاقستاندا انا مەن بالانىڭ ءتيىستى مەديسينالىق قىزمەت كورسەتەتىن ينفراقۇرىلىم تولىقتاي قالىپتاستى دەپ نىق سەنىممەن ايتا الامىن.
بۇگىندە مەملەكەتىمىز انا مەن بالاعا باعىتتالعان مەديسينالىق كومەكتىڭ تەگىن بولۋىنا تولىقتاي كەپىلدىك بەرىپ وتىر. قازىرگى تاڭدا جۇكتى ايەلدەرگە ەلىمىز بويىنشا 240 ستاتسيونارلىق ەمحانالار كۇن سايىن قىزمەت كورسەتەدى. بۇدان باسقا ءبىر ساتتە 9 مىڭنان استام جۇكتى انالاردى بوساندىرىپ، ولارعا بارلىق مەديسينالىق كومەكتى كورسەتەتىن مۇمكىندىگىمىز بار. جۇكتى ايەلدەرگە مەديسينالىق قىزمەت كورسەتەتىن نىساندىردىڭ 45 پايىزى اۋىل مەن اۋداندىق جەرلەردە ورنالاسقانىن ايتا كەتۋىمىز كەرەك. وسىلايشا اۋىلدا دا، قالادا دا انا مەن بالانىڭ ءومىرىن ساقتاپ، دەنساۋلىعىن جاقسارتۋ باعاتىنداعى جۇمىستار توقتاۋسىز ءجۇرىپ جاتىر، – دەيدى ماعريپا حاميت قىزى.
انا مەن بالانىڭ دەنساۋلىعىن جاقسارتۋدا دۇرىس تاماقتاندىرۋدىڭ ماڭىزى زور. ماماندا دۇرىس تاماقتانۋ – دەنساۋلىقتى ساقتاۋدىڭ ماڭىزدى اسپەكتىسى ەكەنىن العا تارتىپ كەلەدى. اسىرەسە، اۋىلدىق جەرلەردە انالار مەن بالالاردىڭ تاماقتانۋ ماسەلەلەرىنە كوپ كوڭىل ءبولىمىز كەرەك.
وسى رەتتە مەملەكەتتىك باعدارلامالار ارقىلى جۇكتى ايەلدەر مەن بالا ەمىزەتىن انالارعا قاجەتتى دارۋمەندەر مەن مينەرالدار تەگىن بەرىلۋدە. سونىمەن قاتار، ەمشەك سۇتىمەن تاماقتاندىرۋدى ناسيحاتتاپ، ايەل انالار اراسىندا نارەستەلەردى دۇرىس تاماقتاندىرۋدى قولداپ كەلەمىز.
بۇدان باسقا بالالار دەنساۋلىعىن ساقتاپ، اۋرۋلاردىڭ الدىن الۋدا دا كوپتەگەن جۇمىستار اتقارىلىپ كەلەدى. بۇگىندە بالالار اراسىندا ءجيى كەزدەسەتىن اۋرۋلاردىڭ الدىن الۋ ءۇشىن ەلىمىزدە ۆاكسيناسيالاۋ ءىسى كەڭىنەن جۇرگىزىلىپ كەلەدى. قازاقستاندا بارلىق بالالارعا تەگىن ۆاكسينالار ۇسىنىلادى، ونىڭ ىشىندە تۋبەركۋلەز، گەپاتيت، قىزىلشا، كوكجوتەل سياقتى اۋرۋلارعا قارسى ۆاكسيناسيا الۋدىڭ ماڭىزى زور. سونىمەن قاتار، مەكتەپكە دەيىنگى جانە مەكتەپ جاسىنداعى بالالاردىڭ مەديسينالىق تەكسەرۋدەن ءوتۋى مىندەتتى تۇردە قامتاماسىز ەتىلگەنىن ايتا كەۋتىمىز كەرەك.
انا مەن بالا دەنساۋلىعىن قورعاۋدا پسيحولوگيالىق كومەك تە ماڭىزدى ءرول اتقارادى. جۇكتى ايەلدەر مەن جاس انالارعا پسيحولوگيالىق قولداۋ كورسەتۋ ءۇشىن ارنايى قىزمەتتەر ۇيىمداستىرىلىپ، سترەسس پەن دەپرەسسيانىڭ الدىن الۋ باعىتىندا جۇمىس جۇرگىزىلۋدە. سونداي-اق، بالالارعا ارنالعان پسيحولوگيالىق كومەك قىزمەتتەرى مەكتەپتەر مەن بالاباقشالاردا قولجەتىمدى ەكەنىن ايتا كەتۋىمىز كەرەك.
ءقازىر اۋىلدىق جەرلەردە انا مەن بالا دەنساۋلىعىن قورعاۋ قيىندىق تۋدىرادى. ويتكەنى، مەديسينالىق قىزمەتتەردىڭ قولجەتىمدىلىگى قالاعا قاراعاندا شەكتەۋلى. وسىعان بايلانىستى، دەنساۋلىق ساقتاۋ مينيسترلىگى اۋىلدىق جەرلەردە كوشپەلى مەديسينالىق بريگادالاردى ۇيىمداستىرىپ، ساپالى مەديسينالىق قىزمەت كورسەتۋدى قامتاماسىز ەتۋگى كۇش سالىپ كەلەدى. بريگادالار انالارعا جۇكتىلىك كەزەڭىندە كەڭەس بەرىپ، بالالارعا ۆاكسينالار ەگۋ، جانە باسقا دا الدىن الۋ شارالارىن ۇزدىكسىز جۇرگىزىپ كەلەدى.
انا مەن بالا دەنساۋلىعىن جاقسارتۋ ءۇشىن مەديسينا قىزمەتكەرلەرىنىڭ بىلىكتىلىگىن ارتتىرۋ باعدارلامالارى ۇنەمى جاڭارتىلىپ وتىرادى. مەديسينالىق مەكەمەلەردە قىزمەت ەتەتىن ماماندار تۇراقتى تۇردە كۋرستاردان ءوتىپ، حالىقارالىق تاجىريبەمەن تانىسىپ، ءوز بىلىكتىلىگىن ارتتىرۋدا. بۇل شارالار دەنساۋلىق ساقتاۋ سالاسىنداعى جاڭا ادىس-تاسىلدەردى يگەرۋگە جانە ساپالى قىزمەت كورسەتۋگە مۇمكىندىك بەرەدى.
جالپى العاندا، قازاقستاندا انا مەن بالانىڭ دەنساۋلىعىن قورعاۋ ماقساتىندا كوپتەگەن ماڭىزدى شارالار اتقارىلىپ جاتىر. بۇل شارالار بولاشاق ۇرپاقتىڭ دەنساۋلىعىن ساقتاپ، جاقسارتۋعا باعىتتالعان. بۇل باعىتتاعى جۇمىستىڭ تيىمدىلىگىن ارتتىرۋ ءۇشىن مەملەكەتتىك قولداۋ جالعاسا بەرەتىن بولادى.
