الەۋمەتتىك مەديسينالىق ساقتاندىرۋ قورى ءتوراعاسىنىڭ ورىنباسارى شقو-دا بيۋدجەت قاراجاتىن جىمقىردى دەپ كۇدىككە ءىلىندى،دەپ حابارلايدى Dalanews.kz.
الەۋمەتتىك مەديسينالىق ساقتاندىرۋ قورى (ءامسق) ءتوراعاسىنىڭ ورىنباسارى شىعىس قازاقستان وبلىسىندا (شقو) بيۋدجەت قاراجاتىن جىمقىردى دەگەن كۇدىككە ءىلىندى. بۇل تۋرالى سىبايلاس جەمقورلىققا قارسى قىزمەت ءتوراعاسىنىڭ ورىنباسارى دارحان قۇراقبايەۆ حابارلادى.
«بۇل ءىس شىعىس قازاقستان ءوڭىرى تۇرعىندارىن ەمدەۋگە بولىنگەن بيۋدجەت قاراجاتىن جىمقىرۋعا بايلانىستى. مەن تەك كۇدىكتى لاۋازىمدى تۇلعانىڭ تەرگەۋ مۇددەسى ءۇشىن قىزمەتىنەن ۋاقىتشا شەتتەتىلگەنىن عانا ايتا الامىن»، – دەدى قۇراقبايەۆ سەنات كۋلۋارىندا.
ول تەرگەۋ مۇددەسىنە بايلانىستى باسقا اقپارات جاريا ەتىلمەيتىنىن ايتتى.
ايتا كەتەيىك، قازىرگى ۋاقىتتا ءامسق باسقارما ءتوراعاسىنىڭ مىندەتىن اتقارۋشى قىزمەتىن سۆەتلانا پونوماريەۆا اتقارادى، ال ءتوراعا ورىنباسارلارى – ساۋلە تاجىبايەۆا، عالىمجان ءابىلوۆ جانە ينديرا سەرىكوۆا.
ولاردىڭ ىشىندە تەك عالىمجان ءابىلوۆتىڭ عانا شقو-دا جۇمىس ىستەگەنى بەلگىلى. ول 2022 جىلدان باستاپ اباي وبلىسىنداعى قور فيليالىن باسقارعان، ال وعان دەيىن 2019 جىلدىڭ تامىز ايىنان باستاپ ءامسق-نىڭ شىعىس قازاقستان وبلىستىق فيليالىنىڭ ديرەكتورى بولعان. 2024 جىلدىڭ شىلدە ايىندا ءامسق ءتوراعاسىنىڭ ورىنباسارى قىزمەتىنە تاعايىندالعان.
