بەلگىلى سپورت ءجۋرناليستى اسلان قاجەنوۆ ءوزىنىڭ فەيسبۋكتاعى پاراقشاسىندا تاياۋدا قازاق راديوسىنا سۇحبات بەرىپ، بەلگىلى سپورت ءجۋرنليستى امانگەلدى سەيىتحان ۇلىنىڭ مەزگىلسىز قازاسىنا قاتىستى ءبىراز شىندىقتى ايتقانىن العا تارتتى. ول ارىپتەسىنىڭ مەزگىلسىز قازاسى جايىندا ويىن بىلايشا پىكىر ءبىلدىردى.

– جاقىندا قازاق راديوسىنداعى «بەستسەللەر» باعدارلاماسىنا سۇحبات بەردىم. اڭگىمەمىز ءبىر كەزدە امانگەلدى سەيىتحانعا بۇرىلدى.

ونىڭ ىشىندە امان اعانىڭ تىكەلەي ەفيردەن شەتتەتىلىپ، كوممەنتاتور بولۋىنا كەدەرگى كەلىترگەندى دە ايتتىم.

ماسەلەن، اعامىز 2016-2017 جىلدارعا دەيىن ميكروفون ۇستاپ، بىزبەن بىرگە «پوليادا» ءجۇردى. ونى قىزمەتتە وسىرمەۋ تۋرالى تىكەلەي بۇيرىق بولدى. شەتەلدەگى سپورتتىق شارالارعا بارۋىنا مۇمكىندىك بەرمەدى.

وسىدان كەيىن امالسىز، جۇمىستان ۋاقىتشا شىعىپ، فەدەراسياعا نە مينيسترلىككە كەلىسىممەن جۇمىسقا تۇرادى. ءسويتىپ، سولاردىڭ اتىنان عانا بارىپ جۇرگەنىن كوردىم.

ال رەداكتور بولعان كەزىندە ءماتىندى وزگەرتۋگە، ءتىپتى، ەفيردەگى ماتەريالعا تيىسۋگە تىيىم سالدى.

وسىنىڭ ءبارىن بوعىمەن جاستى قىز-جىگىتتەر ىستەدى. ارينە، مورالدىق تۇرعىدا اۋىر. اعامىزدىڭ كەمشىلىگى – سونىڭ ءبارىن ىشىندە ساقتادى. اشىق ايتپادى. شەرىن تارقاتپادى. سوڭىندا قايتىس بولۋىنا دا سول تۇرتكى دەپ ويلايمىن.

ويتكەنى، كوۆيد كەزىندە وسىنداي جارالاردىڭ بەتى اشىلىپ، بارلىق اۋرۋ قوزادى عوي. قىسقاسى، ءسويتىپ، امانگەلدى سەيىتحاندى ءولتىردى. اششىلاۋ بولسا دا، اشىعى وسى. ەندى ودان جاقسى ادام تاپپاي ءجۇرمىز.

قالاي بولعاندا دا، امانگەلدى سەيىتحان ءوز بيىگىندە قالدى. ونىڭ ەسىمىن دە، ەڭبەگىن دە كوپشىلىك جاقسى بىلەدى. ءبىز تۇرعاندا ناسيحاتتالا بەرەدى دە.

ال، ونىڭ بالاعىنان تارتىپ، جان-جاعىنان جۇلمالاعان كىمدەر؟ ولاردى ەشكىم بىلمەيدى. ولار ءالى ءتىرى ءجۇر. ولار سولاي ومىردەن وتەدى دە.

وكىنىشتىسى، امانگەلدى سەيىتحان سياقتى تالاي ادامدى جالماپ كەتەدى. ولاردا وكىنىش بولمايدى. ولاردىڭ ميسسياسى سول. ولاردىڭ قولىنان باسقا ەشتەڭە كەلمەيدى. راديوداعى سۇحباتتى وسىنداي ويلارمەن تۇيىندەدىم...