وبلىس باسشىسىمەن كەزدەسۋگە سايلاۋدا ەل سەنىمىنە يە بولعان ەكى ايەل اكىم – اقسۋ اۋدانى ويتوعان اۋىلدىق وكرۋگىنىڭ اكىمى ۆەنەرا بەرىكوۆا، سارقان اۋدانى امانبوكتەر اۋىلدىق وكرۋگىنىڭ اكىمى شىرىنگۇل نۇرحانوۆا، ەڭ جاس اكىم رەتىندە قاراساي اۋدانى ەلتاي اۋىلدىق وكرۋگىنىڭ اكىمى ءبىرجان ماحاتوۆ، سول سياقتى تالعار اۋدانى پانفيلوۆ اۋداندىق وكرۋگىنىڭ اكىمى سەرىك شالوۆ، تالعار اۋدانى بەسقاينار اۋىلدىق وكرۋگىنىڭ اكىمى ارمان جابايەۆ كەلدى. سونىمەن قاتار اۋدان باسشىلارى مەن باسقا دا جاڭا سايلانعان وكرۋگ اكىمدەرى جيىنعا بەينەبايلانىس ارقىلى قوسىلدى.
الدىمەن جاڭا لاۋازىمعا يە بولعان وكرۋگ اكىمدەرىن سايلانۋلارىمەن قۇتتىقتاعان وبلىس اكىمى ولاردىڭ جۇمىستارىنا ساتتىلىك تىلەدى. جانە ءبىرقاتار مىندەت-ماقساتتارعا توقتالدى.
- مەملەكەت باسشىسى قاسىم-جومارت توقايەۆتىڭ باستاماسىمەن قازاقستاندىق قوعامدى دەموكراتيالاندىرۋ ماقساتىندا اكىمدەر سايلاۋى ءوتىپ، سايلاۋدا حالىق سەنىمىنە يە بولدىڭىزدار.
ءبىزدىڭ وبلىستا 71 وكرۋگتە سايلاۋ ءوتتى، سونىڭ 37-سىندە اكىمدەر وزگەردى. مەن بارلىق اكىمدەردىڭ ءومىربايانىن قاراپ شىقتىم، ءبارىنىڭ تاجىريبەسى بار، ءبىلىمدى ازاماتتار، ياعني كادرلاردىڭ ساپالىق قۇرامى جاقسى. وبلىستا جالپى سانى 742 ەلدى مەكەن بار. ونىڭ ءارقايسىسىنا بارۋعا ءبىزدىڭ ۋاقىتىمىز دا، مۇمكىندىگىمىز دە بولا بەرمەيدى.
سوندىقتان سول وڭىرلەردەگى جاعداي قانداي، حالىقتىڭ قانداي وتىنىش-تىلەگى بار، سونىڭ بارلىعىن ءبىلىپ، شەشىمىن كۇتكەن ماسەلەلەر بولسا، بىزگە جەتكىزىپ، بىرلەسىپ جۇمىس ىستەۋىمىز كەرەك. وڭىرلەردەگى جۇمىسقا جاڭاشا كوزقاراس قاجەت، ءار ىستە باستاماشى بولۋ كەرەك.
ايماقتاردا سۋ، جول، ءۇش اۋىسىمدى مەكتەپتەر، باسقا دا وزەكتى ماسەلەلەر كوتەرىلىپ جاتادى. سولاردىڭ ءارقايسىسىن ءجىتى زەردەلەپ، ءمان-جايدان حاباردار بولىپ، شەشىمىن قاراستىرۋ كەرەك.
ەلدى مەكەندەردە تۇرمىستىق قاتتى قالدىقتاردى بەي-بەرەكەت تاستاۋعا جول بەرىلمەۋى ءتيىس. گازداندىرۋ ىسىنە دە ەرەكشە نازار اۋدارۋ كەرەك. بىزدە اتقارىلىپ جاتقان جۇمىس كوپ، ونى دا حالىققا جەتكىزىپ ايتىڭىزدار.
اۋىلدىق جەرلەردە شارۋاشىلىقتار سۋبسيديا الدى ما، قاي وڭىرلەرگە سەرۆيستىك دايىنداۋ ورتالىعىن قۇرۋ كەرەك، قاي ايماققا تەحنيكا قاجەت، قاي اۋىلدا جاعدايى تومەن قانشا وتباسى بار، وسىنىڭ بارلىعى سىزدەردىڭ ءجىتى نازارلارىڭىزدا بولۋى كەرەك.
وكرۋگتەرگە بولىنگەن بيۋدجەت قاراجاتى ءتيىمدى پايدالانىلۋى ءتيىس. ءبىز جاڭا وكرۋگ اكىمدەرىنەن جاندى جۇمىس، تىڭ باستامالار كۇتەمىز. ءوزارا بىرلەسىپ اتقارعاندا عانا جۇمىسىمىز ناتيجەلى بولادى، - دەدى ا. باتالوۆ.
مۇنان سوڭ اقسۋ اۋدانى ويتوعان اۋىلدىق وكرۋگىنىڭ اكىمى ۆەنەرا بەرىكوۆا 14 جىلدان بەرى مەملەكەتتىك قىزمەتتە جۇرگەنىن تىلگە تيەك ەتىپ، ءوزى تۋعان ءوڭىردىڭ دامۋىنا اتسالىسىپ كەلە جاتقانىن ايتتى. ول ەندى وكرۋگ اكىمى رەتىندە تۋعان جەرىنە قىزمەت ەتپەك.
ال اسكەري سالادا ءبىراز جىل ەڭبەك ەتىپ، ءتارتىپ پەن تاباندىلىققا توسەلگەن مامان، تالعار اۋدانى پانفيلوۆ اۋىلدىق وكرۋگىنىڭ اكىمى سەرىك شالوۆ ءوز سوزىندە ەل سەنىمىن اقتاپ، حالىققا ادال قىزمەت ەتەتىنىن ايتتى:
- 71،9% داۋىس جيناپ، ەل ءۇمىتىن ارقالاپ اكىمدىك قىزمەتكە كىرىستىم. اسكەري ادام رەتىندە ناتيجەگە جۇمىس ىستەۋگە بار كۇش-جىگەرىمدى جۇمسايمىن. ءقازىر سايلاۋالدى باعدارلامانى ورىنداۋعا، حالىقتىڭ تالاپ-تىلەگىن ىسكە اسىرۋعا وڭىردەگى اقساقالدار كەڭەسى، قوعامدىق كەڭەس سياقتى قوعامدىق ۇيىمدارمەن بىرلەسىپ كىرىسىپ جاتىرمىز. ەلدىڭ سەنىمىن اقتاپ، كوپتىڭ يگىلىگىنە قىزمەت ەتەتىنىمە سەندىرەمىن، - دەدى س.شالوۆ.
جيىندى قورىتىندىلاعان اماندىق باتالوۆ اۋدان، قالا باسشىلارىنا جانە اۋىلدىق وكرۋگ اكىمدەرىنە ەلباسى مەن پرەزيدەنت تاپسىرمالارىنا وراي مىندەتتەر جۇكتەپ، جۇمىستارىنىڭ جەمىستى بولۋىنا تىلەكتەستىگىن ءبىلدىردى.
