اقتوبە جانە باتىس قازاقستان وبلىستارىنداعى كەزدەسۋ بارىسىندا تۇرعىندار ەلدى مەكەندەردى قالپىنا كەلتىرۋ ماسەلەلەرىن كوتەردى.
پارتيا زارداپ شەككەن اۋداندارعا 70 ملن تەڭگەدەن استام سوماعا قۇرىلىس ماتەريالدارىن جەتكىزۋدى كوزدەپ وتىر.
اقتوبە وبلىسىنىڭ قوبدا اۋدانىندا 101 ءۇي، باتىس قازاقستان وبلىسىندا 80-گە جۋىق ءۇي تاسقىننان زارداپ شەكتى.
سۋ باسقان ەلدى مەكەندەردىڭ تۇرعىندارىمەن كەزدەسۋدە «AMANAT» پارتياسىنىڭ مۇشەلەرى بولىنگەن كومەكتىڭ ادامدارعا جەتكەن-جەتپەگەنىن ناقتىلاپ، ۇيلەردى قالپىنا كەلتىرۋ ءۇشىن تاعى قانداي كومەك قاجەت ەكەنىن انىقتادى.
ءماجىلىس دەپۋتاتتىعىنا كانديدات ەرلان سايروۆ زارداپ شەككەن اۋداندارعا ون كۇن ىشىندە «AMANAT» پارتياسى 70 ملن تەڭگەدەن استام سوماعا قۇرىلىس ماتەريالدارىن جەتكىزەتىنىنە ۋادە بەردى. ەڭ الدىمەن، سەمەنت، سىلاق (شپاتليەۆكا)، لينولەۋم جانە وزگە دە قاجەتتى ماتەريالدار جەتكىزىلەدى.
«AMANAT» پارتياسى ءارقاشان حالىقپەن بىرگە. بۇل جولى دا پارتيالىقتار شەت قالعان جوق. ون كۇن ىشىندە پارتيا ەسەبىنەن ۇيلەردى قالپىنا كەلتىرۋگە قاجەتتى قۇرىلىس ماتەريالدارى ساتىپ الىنىپ، زارداپ شەككەندەرگە جەتكىزىلەدى»، – دەدى ەرلان سايروۆ.
دەپۋتاتتىققا كانديدات جىل سايىن تاسقىن بەلگىلى ءبىر جەرلەردە عانا ورىن الاتىنىن، ءبىراق ونىڭ الدىن الۋ ءۇشىن جۇيەلى شارالار قابىلدانبايتىنىن اتاپ ءوتتى.
سوندىقتان، پارتيانىڭ سايلاۋالدى باعدارلاماسىندا قامتىلعان مىندەتتىڭ ءبىرى: تۇرعىنداردى ماۋسىمدىق سۋ تاسقىنىنان قورعاۋ جانە گيدروتەحنيكالىق قۇرىلىستار جۇيەسىندە ءتارتىپ ورناتۋ. ءماجىلىستىڭ جاڭا شاقىرىلىمىندا «AMANAT» پارتياسىنىڭ فراكسياسى تاسقىن ماسەلەسىن زاڭنامالىق دەڭگەيدە شەشۋگە كىرىسەدى.
تاسقىننان زارداپ شەككەن تۇرعىندارعا وتەماقى تولەۋ ماسەلەسى جەكە تالقىلاندى. ءماجىلىس دەپۋتاتتىعىنا كانديدات ەربول سالىقوۆتىڭ ايتۋىنشا، «AMANAT» فيليالدارى وتەماقىنىڭ ءادىل ءارى ۋاقتىلى تولەنۋى ماسەلەسىن باقىلاۋعا الادى.
اماناتتىقتار تۇرعىندارعا «AMANAT» پارتياسىنىڭ اقتوبە وبلىسى بويىنشا وڭىرلىك باعدارلاماسىن ىسكە اسىرۋ اياسىندا الداعى 5 جىلدا 8 بوگەتكە كۇردەلى جوندەۋ جۇرگىزۋگە قول جەتكىزۋگە نيەتتى ەكەنىن جەتكىزدى.
2028 جىلعا دەيىن باتىس قازاقستان وبلىسىندا 9 ماگيسترالدى سۋ ارناسى جانە 7 قولدانىستاعى سۋ قويماسى قايتا جوندەلەدى.
