ەلنۇر بەيسەنبايەۆ جوبا اياسىندا نەسيە بويىنشا بەرەشەگى بار جانە بورىشكەرلەر تىزىمىندە تۇرعان اۋىل تۇرعىندارى، ءدال قازىرگى ۋاقىتتا قارىزى بار جانە ونىڭ مەرزىمىن وتكىزىپ العان ازاماتتار، سونداي-اق مەملەكەتتەن جەڭىلدىكپەن نەسيە الۋعا ۇمىتكەر ءىسىن جاڭادان باستاعان كاسىپكەرلەر وقۋدان وتە الاتىنىن اتاپ ءوتتى.
«ءبىز اۋىلدىڭ ءال-اۋقاتىن ارتتىرۋ جانە اگرارلىق سەكتوردى قولداۋ مەملەكەتتىڭ ستراتەگيالىق باسىمدىعىنىڭ ءبىرى ەكەنىنە سەنىمدىمىز. ءبىزدىڭ باستى مىندەتىمىز – ەلدى ازىق-تۇلىكپەن قامتىپ وتىرعان شارۋالارعا جاعىمدى جاعداي جاساۋ. ول ءۇشىن جەكە قوسالقى شارۋاشىلىقتار مەن شارۋا قوجالىقتارى نەسيەگە قول جەتكىزە الۋى ءتيىس.
ءدال وسى رەتتە، قارجىلىق ساۋاتتىلىق دەڭگەيىن ساپالى ارتتىرۋ ماسەلەسى تۋىندايدى. بۇل جوبا قارجىلىق الاياقتىقتى ازايتۋعا، شامادان تىس قارىزدانىپ قالۋدى بولدىرماۋعا جانە اۋىل تۇرعىندارىنىڭ قارجىلىق مادەنيەتىن جاقسارتۋعا نەگىزدەلگەن»، – دەدى ەلنۇر بەيسەنبايەۆ.
«Halyk ەلدەگى جەتەكشى بانك رەتىندە مۇنداي ماڭىزدى باستامادان تىس قالا المايدى. ەلىمىزدە حالىقتىڭ قارجىلىق ساۋاتتىلىق دەڭگەيىن ارتتىرۋعا باعىتتالعان قارجىلىق ءبىلىم بەرۋ جۇيەسىن قالىپتاستىرۋ جۇمىسى باستالادى. بۇل اسىرەسە شالعاي اۋدانداردىڭ تۇرعىندارى ءۇشىن اسا ماڭىزدى. ءبىز تەك جوبانى قارجىلاندىرىپ قانا قويماي، وقىتۋ باعدارلاماسىنا تاجىريبەلىك ءبىلىم مەن كەيستەردى ينتەگراسيالاۋدى كوزدەي وتىرىپ، ساراپشى رەتىندە قاتىسۋعا دايىن ەكەنىمىزدى ايرىقشا اتاپ وتكىم كەلەدى»، – دەپ اتاپ ءوتتى Halyk Bank-تىڭ باسقارما ءتوراعاسى ءۇمىت شاياحمەتوۆا.
جوبا اياسىندا اۋىلدىق ەلدى مەكەندەردىڭ 80 مىڭعا جۋىق تۇرعىنىن قامتۋ جوسپارلانۋدا. ولاردى 80 قارجى مامانى وقىتادى.
جوباعا قاتىسۋشىلار ءوز قاراجاتىن ءتيىمدى باسقارۋدى جانە شىعىندى وڭتايلاندىرۋدى ۇيرەنەدى دەپ كۇتىلۋدە. ولار قارجىعا قاتىستى ماسەلەلەر قالاي پايدا بولاتىنىن، ءدال قازىرگى ۋاقىتتاعى نەسيەلىك قارىزدار سانىن ازايتۋدىڭ قانداي جولدارى بارىن، الاياقتىق ارەكەتتەردى قالاي انىقتاۋ قاجەت ەكەنىن بىلەتىن بولادى. ال ءىسىن جاڭادان باستاعان كاسىپكەرلەر كومپانيا بيۋدجەتىن قالىپتاستىرۋ تارتىبىنە، سالىق ەسەپ-قيسابىن ۇسىنۋعا جانە مەملەكەتتىك قولداۋ باعدارلامالارىنىڭ قارجىلاندىرۋ شارتىنا قاتىستى قۇندى اقپارات الادى.
«قارىزسىز قوعام» جوباسىنىڭ العاشقى كەزەڭىندە ەلىمىزدىڭ 8 ءوڭىرى قامتىلادى: اقتوبە، الماتى، تۇركىستان، سولتۇستىك قازاقستان، باتىس قازاقستان، جامبىل، اتىراۋ جانە ماڭعىستاۋ وبلىستارى.
