«AMANAT» partiiasy Halyk Bank-pen birge «Qaryzsyz qoǵam» jobasyn qolǵa aldy
Qarjylyq saýattylyq deńgeiin arttyrmai, aýyl turǵyndarynyń ál-aýqatyn jaqsartý múmkin emes. Sondyqtan «AMANAT» partiiasy Halyk Bank-pen birge «Qaryzsyz qoǵam» jobasyn iske qosty. Búgin tiisti Memorandýmǵa partiianyń atqarýshy hatshysy Elnur Beisenbaev jáne banktiń basqarma tóraǵasy Úmit Shaiahmetova qol qoidy.
Elnur Beisenbaev joba aiasynda nesie boiynsha bereshegi bar jáne boryshkerler tiziminde turǵan aýyl turǵyndary, dál qazirgi ýaqytta qaryzy bar jáne onyń merzimin ótkizip alǵan azamattar, sondai-aq memleketten jeńildikpen nesie alýǵa úmitker isin jańadan bastaǵan kásipkerler oqýdan óte alatynyn atap ótti.
«Biz aýyldyń ál-aýqatyn arttyrý jáne agrarlyq sektordy qoldaý memlekettiń strategiialyq basymdyǵynyń biri ekenine senimdimiz. Bizdiń basty mindetimiz – eldi azyq-túlikpen qamtyp otyrǵan sharýalarǵa jaǵymdy jaǵdai jasaý. Ol úshin jeke qosalqy sharýashylyqtar men sharýa qojalyqtary nesiege qol jetkize alýy tiis.
Dál osy rette, qarjylyq saýattylyq deńgeiin sapaly arttyrý máselesi týyndaidy. Bul joba qarjylyq alaiaqtyqty azaitýǵa, shamadan tys qaryzdanyp qalýdy boldyrmaýǵa jáne aýyl turǵyndarynyń qarjylyq mádenietin jaqsartýǵa negizdelgen», – dedi Elnur Beisenbaev.
«Halyk eldegi jetekshi bank retinde mundai mańyzdy bastamadan tys qala almaidy. Elimizde halyqtyń qarjylyq saýattylyq deńgeiin arttyrýǵa baǵyttalǵan qarjylyq bilim berý júiesin qalyptastyrý jumysy bastalady. Bul ásirese shalǵai aýdandardyń turǵyndary úshin asa mańyzdy. Biz tek jobany qarjylandyryp qana qoimai, oqytý baǵdarlamasyna tájiribelik bilim men keisterdi integratsiialaýdy kózdei otyryp, sarapshy retinde qatysýǵa daiyn ekenimizdi airyqsha atap ótkim keledi», – dep atap ótti Halyk Bank-tyń Basqarma tóraǵasy Úmit Shaiahmetova.
Joba aiasynda aýyldyq eldi mekenderdiń 80 myńǵa jýyq turǵynyn qamtý josparlanýda. Olardy 80 qarjy mamany oqytady.
Jobaǵa qatysýshylar óz qarajatyn tiimdi basqarýdy jáne shyǵyndy ońtailandyrýdy úirenedi dep kútilýde. Olar qarjyǵa qatysty máseleler qalai paida bolatynyn, dál qazirgi ýaqyttaǵy nesielik qaryzdar sanyn azaitýdyń qandai joldary baryn, alaiaqtyq áreketterdi qalai anyqtaý qajet ekenin biletin bolady. Al isin jańadan bastaǵan kásipkerler kompaniia biýdjetin qalyptastyrý tártibine, salyq esep-qisabyn usynýǵa jáne memlekettik qoldaý baǵdarlamalarynyń qarjylandyrý shartyna qatysty qundy aqparat alady.
«Qaryzsyz qoǵam» jobasynyń alǵashqy kezeńinde elimizdiń 8 óńiri qamtylady: Aqtóbe, Almaty, Túrkistan, Soltústik Qazaqstan, Batys Qazaqstan, Jambyl, Atyraý jáne Mańǵystaý oblystary.
