«AMANAT» پارتياسى مەن Halyk Bank قولعا العان «قارىزسىز قوعام» قارجىلىق ساۋاتتىلىقتى ارتتىرۋ جوباسىنا 1،5 مىڭعا جۋىق وتانداسىمىز قاتىسىپ جاتىر. كەشە العاشقى ءدارىس ءوتتى.
پارتيا حاتشىسى ەلدار جۇماعازييەۆ جوباعا قاتىسۋشىلار قارجىلىق ماسەلەلەر قالاي پايدا بولاتىنىن، ءدال قازىرگى ۋاقىتتاعى قارىزدار سانىن ازايتۋدىڭ قانداي جولدارى بار ەكەنىن، الاياقتاردىڭ نەگىزگى الگوريتمدەرىن، نەسيەلىك ءتارتىپ ماسەلەلەرىن جانە ت.ب. زەرتتەيتىنىن اتاپ ءوتتى.
«وسىنداي جوبانىڭ قاجەت ەكەنى بۇرىننان بايقالىپ كەلەدى. قارىزعا بەلشەدەن باتقان كوپ ادام ودان ءوز بەتىنشە قۇتىلا المايدى. ءتىپتى، قايدا بارىپ، كىمنەن كومەك سۇرايتىنىن دا بىلمەيدى. بۇل اسىرەسە اۋىلدىق ەلدى مەكەندەردىڭ تۇرعىندارى ءۇشىن وتە وزەكتى ماسەلە. سوندىقتان ءبىرىنشى كەزەكتە كۋرستار وبلىس ورتالىقتارىندا ەمەس، اۋدانداردا وتەدى»، - دەدى ول.
جوباعا قاتىسۋشىلار كۇندىزگى فورماتتا ساۋاتىن ارتتىرىپ، ءبىر توپتا 50 ادامعا دەيىن وقىتىلادى. وقۋ پروسەسىنىڭ ۇزاقتىعى – 5 جۇمىس كۇنى.
قارجى ماماندارىنىڭ دارىسىنەن بولەك، وقۋ پروسەسىنە قاتىسۋشىلارعا زاڭگەر كومەگى كورسەتىلەدى. ولار ءار قارىز الۋشىنىڭ نەسيە تاريحىن جەكە-جەكە زەرتتەپ، قارىز جۇكتەمەسىن جەڭىلدەتۋ بويىنشا تاجىريبەلىك كەڭەس بەرەدى.
ەسكە سالا كەتەيىك، بۇعان دەيىن «AMANAT» پارتياسى Halyk Bank-پەن بىرگە «قارىزسىز قوعام» جوباسىنىڭ باستالعانىن جاريالاپ، ءتيىستى مەموراندۋمعا قول قويعان بولاتىن. جوبانى Halyk Bank قارجىلاندىرادى.
جوبانىڭ باستى ماقساتى – ازاماتتاردىڭ اسىرەسە، بەرەشەگى بار قارىز الۋشىلاردىڭ (جەكە تۇلعالار) قارجىلىق ساۋاتىن ارتتىرۋ. وقىتۋ جۇمىسى جىل سوڭىنا دەيىن جالعاسادى.
«قارىزسىز قوعام» جوباسى اياسىندا العاشقى كەزەڭدە اقتوبە، الماتى، تۇركىستان، سولتۇستىك قازاقستان، باتىس قازاقستان، جامبىل، اتىراۋ جانە ماڭعىستاۋ وبلىستارىنىڭ 80 مىڭعا جۋىق تۇرعىنى وقىتىلادى.
