«AMANAT» partiiasy men Halyk Bank qolǵa alǵan «Qaryzsyz qoǵam» qarjylyq saýattylyqty arttyrý jobasyna 1,5 myńǵa jýyq otandasymyz qatysyp jatyr. Keshe alǵashqy dáris ótti.
Partiia Hatshysy Eldar Jumaǵaziev jobaǵa qatysýshylar qarjylyq máseleler qalai paida bolatynyn, dál qazirgi ýaqyttaǵy qaryzdar sanyn azaitýdyń qandai joldary bar ekenin, alaiaqtardyń negizgi algoritmderin, nesielik tártip máselelerin jáne t.b. zertteitinin atap ótti.
«Osyndai jobanyń qajet ekeni burynnan baiqalyp keledi. Qaryzǵa belsheden batqan kóp adam odan óz betinshe qutyla almaidy. Tipti, qaida baryp, kimnen kómek suraitynyn da bilmeidi. Bul ásirese aýyldyq eldi mekenderdiń turǵyndary úshin óte ózekti másele. Sondyqtan birinshi kezekte kýrstar oblys ortalyqtarynda emes, aýdandarda ótedi», - dedi ol.
Jobaǵa qatysýshylar kúndizgi formatta saýatyn arttyryp, bir topta 50 adamǵa deiin oqytylady. Oqý protsesiniń uzaqtyǵy – 5 jumys kúni.
Qarjy mamandarynyń dárisinen bólek, oqý protsesine qatysýshylarǵa zańger kómegi kórsetiledi. Olar ár qaryz alýshynyń nesie tarihyn jeke-jeke zerttep, qaryz júktemesin jeńildetý boiynsha tájiribelik keńes beredi.
Eske sala keteiik, buǵan deiin «AMANAT» partiiasy Halyk Bank-pen birge «Qaryzsyz qoǵam» jobasynyń bastalǵanyn jariialap, tiisti memorandýmǵa qol qoiǵan bolatyn. Jobany Halyk Bank qarjylandyrady.
Jobanyń basty maqsaty – azamattardyń ásirese, bereshegi bar qaryz alýshylardyń (jeke tulǵalar) qarjylyq saýatyn arttyrý. Oqytý jumysy jyl sońyna deiin jalǵasady.
«Qaryzsyz qoǵam» jobasy aiasynda alǵashqy kezeńde Aqtóbe, Almaty, Túrkistan, Soltústik Qazaqstan, Batys Qazaqstan, Jambyl, Atyraý jáne Mańǵystaý oblystarynyń 80 myńǵa jýyq turǵyny oqytylady.
