سالتاناتتى ءراسىم بارىسىندا پارتيانىڭ اتقارۋشى حاتشىسى اسحات ورالوۆ بۇل مەديا سىيلىقتىڭ 10 جىلدان استام تاريحى بار ەكەنىن اتاپ ءوتتى. بيىل جاڭا فورماتتا ۇيىمداستىرىلعان بايقاۋ جانرلىق سيپاتتان تاقىرىپتىق باعىتقا اۋىسىپ، قوسىمشا احمەت بايتۇرسىنوۆ اتىنداعى «ءسوز زەرگەرى» جانە شەرحان مۇرتازا مەن كامال سمايلوۆ اتىنداعى «تەليەۆيزيا ۇزدىگى» ارنايى سىيلىقتارى ەنگىزىلدى.
– «اMANAT» مەديا سىيلىعى – حالىقتىڭ ۇزدىك جۋرناليستەرگە بىلدىرگەن العىسى. سەبەبى جۋرناليست – حالىق ءۇنىن جەتكىزەتىن، مەملەكەت مۇددەسى ءۇشىن كۇرەسەتىن تۇلعا. وسى سالتاناتتى كەشكە ۇزدىكتەردىڭ ۇزدىگىن انىقتاۋ ءۇشىن جينالىپ وتىرمىز. مەنىڭ ويىمشا، جۋرناليست دەگەن ماماندىقتى تاڭداۋدىڭ ءوزى ۇزدىك بولۋ. ەلىمىزدە پرەزيدەنت قاسىم-جومارت توقايەۆتىڭ جەتەكشىلىگىمەن وتە ۇلكەن، تاريحي وزگەرىستەر ءجۇرىپ جاتىر. ونىڭ ءمان-مازمۇنىن حالىققا جەتكىزۋ ءىسى ۇلكەن جاۋاپكەرشىلىكتى، اسا زور شەبەرلىك پەن كاسىبيلىكتى تالاپ ەتەدى. بۇل مىندەتتى سىزدەر وتە جوعارى دەڭگەيدە اتقارىپ كەلەسىزدەر. بايقاۋ جاڭا قازاقستاندى قۇرۋ ىسىندە ەلىمىزدىڭ اقپاراتتىق كەڭىستىگىن كۇشەيتۋگە ىقپال ەتەرى ءسوزسىز، – دەدى اسحات ورالوۆ.
بايقاۋ كوميسسياسىنىڭ ءتوراعاسى، بەلگىلى جۋرناليست، اقىن، «AMANAT» پارتياسىنان سايلانعان ءماجىلىس دەپۋتاتى جاناربەك ءاشىمجاننىڭ ايتۋىنشا، بيىل قازىلار القاسىنا 260-تان استام ءوتىنىم جولدانعان.
– بيىل كەلىپ تۇسكەن جۇمىستاردىڭ 70%-دان استامى تەك ايماقتىق بۇقارالىق اقپارات قۇرالدارىنان، ياعني وڭىرلەردەن جولدانعانى قۋانتتى. جاس جۋرناليستەر دە بەلسەندىلىك تانىتتى. ياعني، وتاندىق جۋرناليستيكادا قالامى توسەلگەن مەترلەرمەن قاتار جاس مامانداردىڭ تاراپىنان دا ۇلكەن قىزىعۋشىلىقتى بايقادىق. ارينە، بۇل بايقاۋ ولاردىڭ شىعارماشىلىق شەبەرلىگىن شىڭداي تۇسەرى انىق. «AMANAT» مەديا سىيلىعىنىڭ باستى ماقساتى دا سول، – دەپ اتاپ ءوتتى جاناربەك ءاشىمجان.
سونىمەن، بايقاۋ كوميسسيانىڭ شەشىمىمەن «AMANAT» – 2022 مەديا سىيلىعىنىڭ جەڭىمپاز بولىپ:
«جاڭا قازاقستاندى» قۇرۋ تۋرالى ۇزدىك ماتەريال» نوميناسياسى بويىنشا – «كتك» تەلەارناسىنىڭ ءتىلشىسى اسقاربەك قازانعاپ؛
«الەۋمەتتىك ماسەلەگە ارنالعان ۇزدىك ماتەريال» نوميناسياسى بويىنشا – «پريكاسپييسكايا كوممۋنا» قوعامدىق-ساياسي گازەتىنىڭ اعا ءتىلشىسى انجەلا لي؛
«ايماق تۋرالى ۇزدىك ماتەريال» نوميناسياسى بويىنشا – «حابار24» تەلەارناسىنىڭ اقمولا وبلىسى بويىنشا ءتىلشىسى دامير شايداروۆ؛
«جاستار تۋرالى ۇزدىك ماتەريال» نوميناسياسى بويىنشا – «Dalanews.kz» اقپاراتتىق اگەنتتىكتىڭ اباي وبلىسىنداعى ءتىلشىسى قۋانىش سماعۇلوۆ؛
«رۋحاني-مادەني دامۋعا ارنالعان ۇزدىك ماتەريال» نوميناسياسى بويىنشا – «حابار» تەلەارناسىنىڭ ءتىلشىسى ينديرا جىلقايداروۆا؛
«مەملەكەتتىك رامىزدەرىنىڭ 30 جىلدىعى تۋرالى ۇزدىك ماتەريال» نوميناسياسى بويىنشا – جاڭاقورعان اۋداندىق «جاڭاقورعان تىنىسى» گازەتىنىڭ ءتىلشىسى الىبەك جارىقبايەۆ؛
«AMANAT» پارتياسىنىڭ ترانسفورماسياسى تۋرالى ۇزدىك ماتەريال» نوميناسياسى بويىنشا – ق ر پرەزيدەنتى تەلەراديوكەشەنىنىڭ رەجيسسەرى ۆاديم شيريايەۆ ماراپاتتالدى.
ارنايى سىيلىقتاردىڭ يەگەرلەرى:
احمەت بايتۇرسىنوۆ اتىنداعى «ءسوز زەرگەرى» سىيلىعى – «Egemen Qazaqstan» رەسپۋبليكالىق گازەتىنىڭ تۇركىستان وبلىسى بويىنشا ءتىلشىسى عالىمجان ەلشىباي؛
شەرحان مۇرتازا مەن كامال سمايىلوۆ اتىنداعى «تەليەۆيزيا ۇزدىگى» سىيلىعى – «Qazaqstan» ۇلتتىق تەلەارناسىنىڭ اقپاراتتىق-ساراپتامالىق باعدارلامالار ديرەكسياسىنىڭ باسشىسى جالعاس التايەۆ؛
«بەلسەندى ازاماتتىق ۇستانىمى ءۇشىن» سىيلىعى – بلوگەر، موتيۆاسيالىق كىتاپتاردىڭ اۆتورى، تەلەجۇرگىزۋشى داۋلەت مۇقايەۆقا بەرىلدى.
ءوز كەزەگىندە، بايقاۋ جەڭىمپازدارىنىڭ ءبىرى ينديرا جىلقايداروۆا جاڭعىرۋ جولىنا تۇسكەن «AMANAT» پارتياسىنىڭ مەديا سىيلىعىنا يە بولۋ ۇلكەن مارتەبە ەكەنىن اتاپ ءوتتى.
«AMANAT» – ەلدىڭ سەنىمىن، اماناتىن ارقالاعان پارتيا. بۇگىن مەنىڭ مۇقاعالي ماقاتايەۆتىڭ 91 جىلدىعى تۋرالى جاساعان بەينەماتەريالىم ەلەنىپ جاتىر. بىزدەر، ياعني جۋرناليستتەر قاۋىمى، «AMANAT» پارتياسى دا ەلدىڭ يگىلىگى، قوعامنىڭ دامۋى جولىندا قىزمەت ەتىپ ءجۇرمىز. ەل قامى ءۇشىن ەڭبەك ەتە بەرىڭىزدەر»، - دەدى ول.
ءوزىنىڭ جۇرەكجاردى لەبىزىمەن «جاڭاقورعان تىنىسى» گازەتىنىڭ ءتىلشىسى الىبەك جارىقبايەۆ تا ءبولىستى. «وسىنداي ۇلكەن بايگەنىڭ جۇلدەسى بۇيىرادى دەپ كۇتپەدىم. اۋداندىق گازەتتە جۇمىس ىستەپ ءجۇرىپ، رەسپۋبليكالىق بايقاۋدىڭ جەڭىمپازى بولۋ، بىزدەرگە شالقار شابىت سىيلاپ، شىعارماشىلىعىمىزدى شىڭداي تۇسەدى. «AMANAT» پارتياسىنىڭ سەنىمىن ارقالادىق، ەندى وسى جولدان تايماي، ۇلتقا قىزمەت ەتۋدى جالعاستىرامىز»، - دەدى جۋرناليست.
سۇرەتتى تۇسىرگەن ءالي عالىم
