"وپەراتور روپ" كومپانياسىنىڭ "ۋتيليزاسيالىق الىمدى اكىمشىلەندىرۋ جانە ءتيىستى قاراجاتتاردى باسقارۋ شەڭبەرىندەگى قىزمەتى توقتاتىلدى. ۋتيليزاسيالىق الىم قاراجاتى ەسەبىنەن قۇرىلعان اكتيۆتەر مەملەكەت مەنشىگىنە بەرىلدى" دەلىنگەن حابارلامادا.
كومپانيانىڭ مىندەتىن ەندى مەملەكەتتىك "جاسىل دامۋ" اق اتقارادى.
11 قاڭتاردا قازاقستاننىڭ قازىرگى پرەزيدەنتى ۋتيليزاسيا الىمىن جينايتىن "وپەراتور روپ" كومپانياسىنىڭ جۇمىسىن توقتاتۋدى بۇيىرعان. بۇل كومپانيانىڭ بۇرىنعى پرەزيدەنت نۇرسۇلتان نازاربايەۆتىڭ ءاليا نازاربايەۆاعا قاتىسى بارى ايتىلادى. بۇعان دەيىن بيلىك ۋتيليزاسيا الىمىن جينايتىن "وپەراتور روپ" كومپانياسىنا كەيىنگى بەس جىلدا 691،9 ملرد تەڭگە قاراجات تۇسكەنىن ايتقان.
ەلدە بۇرىنعى پرەزيدەنت نۇرسۇلتان نازاربايەۆتىڭ بيلىگى السىرەپ، قازىرگى پرەزيدەنت قاسىم-جومارت توقايەۆتىڭ ىقپالى ارتتى دەگەن بولجام كۇشەيگەن تۇستا ەكس-پرەزيدەنتتىڭ جاقىندارى بىرىنەن سوڭ ءبىرى قىزمەتتەرىنەن ايىرىلىپ، ەلدەن كەتكەنى جايلى اقپاراتتار ءجيى شىعىپ جاتىر.
