ۇلتتىڭ قورعانى بولار «كوميتەت» دۇنيە مەن بيلەپ-توستەۋدى ماقسات تۇتقان ادامداردىڭ قولىنا ءبىر ەمەس ەكى رەت ءوتتى.
ءبىرىنشىسى اتىشۋلى راحات بولدى. كوميتەتتىڭ باسقا سالاسى ادال بولسا دا راحات اشىق تۇردە بيزنەسمەندەرگە رەيدەرلىك جاساپ، ساياسي كوشباسشىلاردى جويۋعا كىرىسكەنى بۇگىندە جاسىرىن ەمەس.
جەلتوقسانشىلارعا شاماسى جەتكەنشە ارا تۇسكەن، سوناۋ «بايقوڭىر» وقيعاسىندا وزىمە دە كومەكتەسىپ ۇلت مۇددەسىن قورعاعان «كوميتەت» ىشىندە وزگەرىس باستالدى.
ەلىمىزدىڭ ۇقك قىزمەتكەرلەرى كەڭەس مەكتەبىنىڭ ءبىلىمى مەن تاجىريبەسىن مىقتى يگەرگەن ماماندار ەدى. ءبىراق باسشىسىنىڭ ەگويزمى ابىرويىنا كولەڭكە ءتۇسىردى. سوسىن ول قىلمىستارى اشكەرە بولىپ قاشتى دا، باسشىلىق قايتا اۋىستى. ابىرويى قالپىنا كەلە باستاعان مەكەمە تىزگىنى اۋىسا كەلە ك.ءماسىموۆتىڭ قولىنا ءوتتى. قاشىپ ءجۇرىپ كوز جۇمعان بۇرىنعى باسشىعا قاراعاندا، تىنىش جۇرگەندەي كورىنگەنىمەن بار پالە ىشىندە ەدى.
بۇل قىزمەتكە كەلە سالا ءتۇرلى قاۋەسەت تە قاۋلاي جونەلگەنى كوپشىلىكتىڭ ەسىندە. ول قاۋەسەتتەردىڭ ەڭ قورقىنىشتىسى بوگدە ەلگە قىزمەت ەتەتىنى ەدى. باسىندا «قۇدا، كۇيەۋ بالا» ارقىلى بيلىك پەن بايلىققا قول جەتكىزگەن ءماسىموۆ كۇشەيە بەردى. بۇرىنعى ءوزى باعىنعان ادامداردى ىقتىرىپ الىپ ءتىپتى جالى كۇجىرەيە ءتۇستى. ءوزى باسشىلىق ەتكەن مەكەمەگە ءوز سويىلىن سوعاتىنداردى كۇلىمسىرەي وتىرىپ جيناي بەردى. بارلىق جەردە بيلىكتىڭ بەدەلىن قۇلاتۋعا كۇش سالدى.
قاڭتار وقيعاسى بۇرىننان دايىندالعان ءىس سەكىلدى. مۇنداي ءىستىڭ الدىن الۋ، مەملەكەت قاۋىپسىزدىگىن قامتاماسىز ەتۋ ءماسىموۆ باسقاراتىن مەكەمەنىڭ مىندەتى ەكەنى كىمگە بولسا دا بەلگىلى. جاڭا پرەزيدەنتىمىز بۇل ءجايتتاردان بەيحابار ەمەس ەكەن. مۇنى ءماسىموۆ تا بىلگەن سىڭايلى.
بۇرىننان جوسپارلاعان ىسىنە كەدەرگى بولارىن سەزگەن ول كوپشىلىكتىڭ بيلىككە رەنىشىن قوزدىرا بەردى.
اقىر سوڭى الماتىداعى قاندى قىرعىنعا ۇلاسقانىنا ءبارىمىز كۋا بولدىق. كوپشىلىكتى تاسالاپ ءوڭى تۇگىلى پيعىلى جات ادامدار قان توگىلۋىنە بارىنشا كۇش سالدى.
ارانداتۋدىڭ ءتۇرلى ادىستەرىن كوردىك. پرەزيدەنتىمىز باتىل ارەكەت جاساماعاندا جاعداي الدەقايدا اۋىر بولار ەدى. تاۋەلسىزدىگىمىزدەن ايىرىلىپ، قىرعىن ءالى جالعاسىپ جاتار ەدى. قۇداي ساقتاپ تاۋەلسىزدىگىمىز قولىمىزدا قالدى.
ەڭ سوراقىسى – «جيىرما مىڭ لاڭكەس ءجۇر» دەگەن اقپاراتتى دا ايتقان ك.ءماسىموۆ. شەكارا مەن ۇلت قاۋىپسىزدىگىن باسقاراتىن باسشى نە قاراپ وتىرعان؟
قاندى قاڭتارعا قانشا قايعىرساق تا «تاۋەلسىزدىك» كوڭىلگە جۇبانىش.
الماتى قالاسىنداعى ۇقك دەپارتامەنتى قۇجاتتاردى ورتەپ، قارۋ-جاراقتى قاراۋسىز قالدىرعانى ءتىپتى اۋىر قىلمىس. حالىق كۇشتىك قۇرىلىمعا مۇلدەم سەنبەيتىن حالگە جەتتى. الەۋمەتتىك جەلىدە پوليسمەندەردىڭ قانىشەرلىك ىستەرى جاريالانىپ ءتىپتى جان تۇرشىكتى.
قارۋلى كۇشتەرىمىزدى دامىتۋ ءۇشىن قانشاما كۇش سالىندى. سوعان قاراماستان ق ر قارۋلى كۇشتەرىنىڭ ءيميدجى ءتىپتى قۇلادى. وسىنىڭ ءبارى ءماسىموۆتىڭ الدىن-الا جاساعان جوسپارى بولاتىن.
ءماسىموۆ جازادان قۇتىلىپ كەتپەۋى كەرەك. شۋلاپ الىپ ارتىنان ۇمىتىپ كەتەتىنىمىز بار. ءتىپتى ونى اقتاعىسى كەلەتىن جازبالار كوبەيىپ بارادى. «اقش پرەزيدەنتىمەن دوس ەكەن» دەگەن جازبا تەگىن جازىلماعان.
ءماسىموۆتىڭ جاۋىز جوسپارى ءالى توقتاپ قالعان جوق. جاۋ ەشقاشان مىزعىمايدى. ۇيىنەن تابىلعان كوپ اقشا ايسبەرگتىڭ توبەسى عانا. قولعا تۇسپەگەن اقشاسى مەن سىبايلاستارى قانشاما. ونىڭ جاساعان قىلمىسىن وزگەنىڭ موينىنا ىلۋگە تىرىسقان ارەكەتتەر ەش تولاستاعان جوق.
الدىڭعى بيلىك داۋىرىندە بيلىكتىڭ ءسوزىن سويلەپ كورگەن ەمەس ەدىم. اعايىن-باۋىرلارىم ق ر قارۋلى كۇشتەرىندە قىزمەت اتقارعاندىقتان ول سالانى كوپ باقىلادىم. جەتىستىكتەرىنە ءسۇيسىنىپ ءجۇردىم.
ءقازىر وزىمىزگە قورعان بولار باتىرلارىمىزدى اياماي تىلدەپ ءجۇرمىز. يمپەريا بولعان كورشىمىزدىڭ شىن احۋالىن كوردىڭىزدەر عوي.
وسى رەتتە پرەزيدەنتىمىزدىڭ باعىتى دۇرىس ەكەنىنە كوزىمىز جەتە تۇسەدى. تامىرى تەرەڭگە كەتكەن جەمقورلىق پەن ساتقىندىقپەن كۇرەسۋ وڭاي ەمەس.
ەل باسقارىپ، حالىقتى قورعاۋ ىسىندە الدا تۇرار قۇزىرلى مەكەمە قيىن جاعدايدا. ول جاعدايعا جەتكىزگەن ءماسىموۆ جازاسىن الۋ كەرەك. قاڭتار قىرعىنىنىڭ قانى جىبەرمەيدى. ەش قىلمىس سۇراۋسىز قالمايدى. حالىق بوپ تالاپ ەتۋگە ءتيىسپىز.
ءساعادالدى ءۇسىبالى
اۆتوردىڭ رۇقساتىمەن باسىلدى
