Ulttyń qorǵany bolar «komitet» dúnie men bilep-tósteýdi maqsat tutqan adamdardyń qolyna bir emes eki ret ótti.
Birinshisi atyshýly Rahat boldy. Komitettiń basqa salasy adal bolsa da Rahat ashyq túrde biznesmenderge reiderlik jasap, saiasi kóshbasshylardy joiýǵa kiriskeni búginde jasyryn emes.
Jeltoqsanshylarǵa shamasy jetkenshe ara túsken, sonaý «Baiqońyr» oqiǵasynda ózime de kómektesip ult múddesin qorǵaǵan «komitet» ishinde ózgeris bastaldy.
Elimizdiń UQK qyzmetkerleri Keńes mektebiniń bilimi men tájiribesin myqty igergen mamandar edi. Biraq basshysynyń egoizmi abyroiyna kóleńke túsirdi. Sosyn ol qylmystary áshkere bolyp qashty da, basshylyq qaita aýysty. Abyroiy qalpyna kele bastaǵan mekeme tizgini aýysa kele K.Másimovtyń qolyna ótti. Qashyp júrip kóz jumǵan burynǵy basshyǵa qaraǵanda, tynysh júrgendei kóringenimen bar pále ishinde edi.
Bul qyzmetke kele sala túrli qaýeset te qaýlai jónelgeni kópshiliktiń esinde. Ol qaýesetterdiń eń qorqynyshtysy bógde elge qyzmet etetini edi. Basynda «quda, kúieý bala» arqyly bilik pen bailyqqa qol jetkizgen Másimov kúsheie berdi. Burynǵy ózi baǵynǵan adamdardy yqtyryp alyp tipti jaly kújireie tústi. Ózi basshylyq etken mekemege óz soiylyn soǵatyndardy kúlimsirei otyryp jinai berdi. Barlyq jerde biliktiń bedelin qulatýǵa kúsh saldy.
Qańtar oqiǵasy burynnan daiyndalǵan is sekildi. Mundai istiń aldyn alý, memleket qaýipsizdigin qamtamasyz etý Másimov basqaratyn mekemeniń mindeti ekeni kimge bolsa da belgili. Jańa prezidentimiz bul jáittardan beihabar emes eken. Muny Másimov ta bilgen syńaily.
Burynnan josparlaǵan isine kedergi bolaryn sezgen ol kópshiliktiń bilikke renishin qozdyra berdi.
Aqyr sońy Almatydaǵy qandy qyrǵynǵa ulasqanyna bárimiz kýá boldyq. Kópshilikti tasalap óńi túgili piǵyly jat adamdar qan tógilýine barynsha kúsh saldy.
Arandatýdyń túrli ádisterin kórdik. Prezidentimiz batyl áreket jasamaǵanda jaǵdai áldeqaida aýyr bolar edi. Táýelsizdigimizden aiyrylyp, qyrǵyn áli jalǵasyp jatar edi. Qudai saqtap táýelsizdigimiz qolymyzda qaldy.
Eń soraqysy – «jiyrma myń lańkes júr» degen aqparatty da aitqan K.Másimov. Shekara men ult qaýipsizdigin basqaratyn basshy ne qarap otyrǵan?
Qandy qańtarǵa qansha qaiǵyrsaq ta «táýelsizdik» kóńilge jubanysh.
Almaty qalasyndaǵy UQK departamenti qujattardy órtep, qarý-jaraqty qaraýsyz qaldyrǵany tipti aýyr qylmys. Halyq kúshtik qurylymǵa múldem senbeitin halge jetti. Áleýmettik jelide polismenderdiń qanisherlik isteri jariialanyp tipti jan túrshikti.
Qarýly kúshterimizdi damytý úshin qanshama kúsh salyndy. Soǵan qaramastan QR Qarýly Kúshteriniń imidji tipti qulady. Osynyń bári Másimovtyń aldyn-ala jasaǵan jospary bolatyn.
Másimov jazadan qutylyp ketpeýi kerek. Shýlap alyp artynan umytyp ketetinimiz bar. Tipti ony aqtaǵysy keletin jazbalar kóbeiip barady. «AQSh prezidentimen dos eken» degen jazba tegin jazylmaǵan.
Másimovtyń jaýyz jospary áli toqtap qalǵan joq. Jaý eshqashan myzǵymaidy. Úiinen tabylǵan kóp aqsha aisbergtiń tóbesi ǵana. Qolǵa túspegen aqshasy men sybailastary qanshama. Onyń jasaǵan qylmysyn ózgeniń moinyna ilýge tyrysqan áreketter esh tolastaǵan joq.
Aldyńǵy bilik dáýirinde biliktiń sózin sóilep kórgen emes edim. Aǵaiyn-baýyrlarym QR Qarýly Kúshterinde qyzmet atqarǵandyqtan ol salany kóp baqyladym. Jetistikterine súisinip júrdim.
Qazir ózimizge qorǵan bolar batyrlarymyzdy aiamai tildep júrmiz. Imperiia bolǵan kórshimizdiń shyn ahýalyn kórdińizder ǵoi.
Osy rette prezidentimizdiń baǵyty durys ekenine kózimiz jete túsedi. Tamyry tereńge ketken jemqorlyq pen satqyndyqpen kúresý ońai emes.
El basqaryp, halyqty qorǵaý isinde alda turar quzyrly mekeme qiyn jaǵdaida. Ol jaǵdaiǵa jetkizgen Másimov jazasyn alý kerek. Qańtar qyrǵynynyń qany jibermeidi. Esh qylmys suraýsyz qalmaidy. Halyq bop talap etýge tiispiz.
Saǵadáldi ÚSIBÁLI
Avtordyń ruqsatymen basyldy
