«ءقادىرلى حالقىم! جامبىل وڭىرىندەگى جەرلەستەرىم! كەشەلى بەرى ايقاي-شۋ كوبەيىپ، ەستۋىمشە ۇلتارالىق كەلىسپەۋشىلىك بولىپ جاتقان كورىنەدى. اينالايىندار، ءبىز قازاق دەگەن كەڭ حالىقپىز. قۇشاعىمىز دا كەڭ. ءبىز وتە سانالى دا اقىلدى، بارلىق جاعىنان – ساۋدا بولسىن، ونەر بولسىن بەيىم حالىقپىز. كىشكەنە سابىر ساقتاڭىزدار.
ەل ىشىندە بىر-ەكى بۇزىق بولۋى مۇمكىن. ول بىزدە دە، باسقادا دا بار. باياعى سوعىس كەزىندە نەمىستەردى، شەشەندەردى، قاراشايلار مەن ۋكراينداردى قۇشاعىمىزعا العان ەلمىز. اكەم تىپتەن ەكى بولمەلى كىشكەنتاي قورجىن تامىنا التى بالاسىمەن بىردەي مۇحامەت دەگەن قاراشاي ازاماتىن پانالاتقان. ال ولار ءقازىر قازاق دەسە جانىن بەرەدى. وتكەنىمىزگە قاراپ، اقىلعا توقتايىق»، – دەيدى التىنبەك قورازبايەۆ.
قازاقستاننىڭ حالىق ءارتىسى زايىرلى ءارى قۇقىقتىق مەملەكەتتە ءىستىڭ اق-قاراسى انىقتالاتىنىنا سەنىم ءبىلدىردى.
«جۇدىرىق بىزدىكى ەكەن دەپ، وكتەمدىك جاساماي-اق قويايىق، اعايىن. اقىلعا توقتاڭدار. دۇنگەندەر – ەڭبەكقور. باياعىدا ەسىمدە جامبىل وبلىسىنداعى ۋلانوۆكا دەگەن اۋىلدا دۇنگەننەن كەڭەس وداعىنىڭ ەڭبەك ەرى بولدى. جۇمىس دەسە بۇلار قۇلشىنا كىرىسەتىن. جەر تىرمالاپ جىلىنا ءۇش-تورت رەت ءونىم الىپ جاتاتىن.
كەشەگى لوندوندا وتكەن وليمپيادا ويىندارىندا وسى دۇنگەننەن سپورتشىلار قازاقتىڭ كوك تۋىن جەلبىرەتىپ، الەمگە قازاقتى پاش ەتتى. الماتىدا دۇنگەننەن كومپوزيتور دوسىم بار. ول كىسى قازاق دەسە ىشكەن اسىن جەرگە قويادى. ءتاتۋ-تاتتى ومىرىمىزبەن باسقا ەلگە ۇلگىمىز. كۇندە شۋ مەن ايقاي بولىپ جاتسا، مۇنىڭ ارتى جاقسىلىققا اپارمايدى. اقىلعا كەلىڭدەر، اينالايىندار»، – دەپ ءسوزىن اياقتادى التىنبەك قورازبايەۆ.
