– تاڭعى ارالاۋ كەزىندە وڭتۇستىك-شىعىستاعى گاز تاراتۋ جەلىلەرىنىڭ قۇرىلىس بارىسىمەن تانىستىم. ءقازىر قازۋ جۇمىستارى مەن گاز رەتتەگىش شكاف پۋنكتىن ورناتۋ جۇرگىزىلىپ جاتىر.
مەردىگەرگە، جۇمىس قارقىنىن باسەڭدەتپەۋدى، قاۋىپسىزدىككە ەرەكشە نازار اۋدارۋدى تاپسىردىم. وڭتۇستىك-شىعىس شاعىن اۋدانىنىڭ تۇرعىندارى كەلەسى جىلىتۋ ماۋسىمىنا دەيىن گازعا قوسىلا الادى. ەلدى-مەكەن تۇرعىندارى عانا ەمەس، قالا تۇرعىندارى دا ۇيلەرىن گازبەن جىلىتا الادى.
بۇعان دەيىن، جەلەزنودوروجنىي، كوكتال-2، اگروقالاشىق (ءبىر بولىگى عانا) ەلدى-مەكەندەرىنىڭ تۇرعىندارى گازعا قوسىلۋ مۇمكىندىگىن الدى. بيىلعى جىلىتۋ ماۋسىمىندا جەو-1 جانە جەو-2 ءبىرقاتار سۋ جىلىتۋ قازاندىقتارى گازعا اۋىستىرىلدى.
گازداندىرۋ مەملەكەت باسشىلىعىنىڭ باقىلاۋىندا. گازداندىرۋ پروسەسى ءۇش كەزەڭنەن تۇرادى.
گازداندىرۋ اتموسفەراعا تارايتىن زياندى قالدىقتاردى ايتارلىقتاي تومەندەتۋگە مۇمكىندىك بەرەدى، ەكولوگياعا وڭ اسەر ەتەدى. سونداي-اق، جەكە سەكتور تۇرعىندارىنىڭ ءومىر ءسۇرۋ جاعدايىن جەڭىلدەتۋگە مۇمكىندىك بەرەدى. ويتكەنى، كومىردىڭ ساپاسىن، ونى ساقتاۋدى ۋايىمداپ، كۇنى بويى ۇيدە بولۋدىڭ قاجەتى جوق، – دەپ جازدى ەلوردا اكىمى.
