التاي ءالى كولىك مينيسترلىگى اۆتوموبيل كولىگى جانە كولىكتىك باقىلاۋ كوميتەتىنىڭ ءتوراعاسى قىزمەتىنەن بوساتىلدى، دەپ حابارلايدى Dalanews.kz.
كولىك ءمينيسترىنىڭ بۇيرىعىمەن التاي ءالى اۆتوموبيل كولىگى جانە كولىكتىك باقىلاۋ كوميتەتىنىڭ ءتوراعاسى قىزمەتىنەن بوساتىلعان.
التاي ءالى 1985 جىلى جامبىل وبلىسىندا دۇنيەگە كەلگەن. اباي اتىنداعى قازاق ۇلتتىق پەداگوگيكالىق ۋنيۆەرسيتەتىن بىتىرگەن. ەڭبەك جولىن 2005 جىلى "راحات پالاس" قوناق ۇيىندە بايلانىس ورتالىعىنىڭ قىزمەتكەرى بولىپ باستاعان.
- 2010-2011 جىلدارى - "دامۋ" كاسىپكەرلىكتى دامىتۋ قورى" اق سۋبسيديالاۋ دەپارتامەنتىنىڭ مەنەدجەرى.
- 2014-2015 جىلدارى - استانا قالالىق سوتىنىڭ باس مامانى.
- 2015-2018 جىلدارى ق ر پرەمەر-مينيسترى كەڭسەسىنىڭ قۇرىلىمىندا جۇمىس ىستەدى.
- 2018 جىلى شىمكەنت قالاسى اكىمىنىڭ اپپارات باسشىسى، كومەكشىسى بولدى.
- 2018-2019 جىلدارى - شىمكەنت قالاسى اكىمى اپپاراتى باسشىسىنىڭ ورىنباسارى - حاتشىلىق مەڭگەرۋشىسى.
- 2019-2020 جىلدارى - شىمكەنت قالاسى ەنەرگەتيكا جانە كوممۋنالدىق شارۋاشىلىق باسقارماسىنىڭ باسشىسى.
- 2021 جىلعى اقپاننان باستاپ 2023 جىلعا دەيىن كولىك كوميتەتى ءتوراعاسىنىڭ ورىنباسارى قىزمەتىن اتقاردى.
ەسكە سالايىق، الەۋمەتتىك جەلىدە "قاراپايىم جۇمىسشى" بولىپ ەڭبەك جولىن باستاعان ەربول قۇلىمبەتتىڭ نەبارى ءبىر جارىم جىل ىشىندە جامبىل وبلىسىنداعى كولىكتىك باقىلاۋ ءبولىمىنىڭ باسشىسى بولىپ تاعايىندالعانى جايلى اقپارات تارادى. ونىڭ مانساپ جولىندا بۇلاي جىلدام ءوسۋىن كولىك مينيسترلىگىندە قىزمەت ەتەتىن التاي الىمەن تۋىستىعىمەن بايلانىستىرعاندار تابىلدى.
مەملەكەتتىك قىزمەت ىستەرى اگەنتتىگى تەكسەرىس جۇرگىزىپ، التاي ءالىنىڭ اكەسى مەن ەربول قۇلىمبەتتىڭ اناسى تۋعان باۋىر ەكەنىن انىقتادى. الايدا اگەنتتىك قولدانىستاعى "سىبايلاس جەمقورلىققا قارسى ءىس-قيمىل تۋرالى" زاڭعا سايكەس مۇنداي تۋىستىق بايلانىس جاقىن تۋىس نەمەسە جەكجات ساناتىنا كىرمەيتىنىن حابارلادى.
سوعان قاراماستان ەربول قۇلىمبەت قىزمەتىنەن ءوز ەركىمەن كەتۋ تۋرالى شەشىم قابىلدادى.
ال التاي ءالى استاناداعى قىزمەتىنەن كەتسە دە، بۇگىن جامبىل وبلىسى اكىمىنىڭ قۇرىلىس جانە تۇرعىن ۇي-كوممۋنالدىق شارۋاشىلىق ماسەلەلەرى جونىندەگى ورىنباسارى بولىپ تاعايىندالدى.
