Altai Áli Kólik ministrligi Avtomobil kóligi jáne kóliktik baqylaý komitetiniń tóraǵasy qyzmetinen bosatyldy, dep habarlaidy Dalanews.kz.
Kólik ministriniń buiryǵymen Altai Áli Avtomobil kóligi jáne kóliktik baqylaý komitetiniń tóraǵasy qyzmetinen bosatylǵan.
Altai Áli 1985 jyly Jambyl oblysynda dúniege kelgen. Abai atyndaǵy Qazaq ulttyq pedagogikalyq ýniversitetin bitirgen. Eńbek jolyn 2005 jyly "Rahat Palas" qonaq úiinde bailanys ortalyǵynyń qyzmetkeri bolyp bastaǵan.
- 2010-2011 jyldary - "Damý" kásipkerlikti damytý qory" AQ sýbsidiialaý departamentiniń menedjeri.
- 2014-2015 jyldary - Astana qalalyq sotynyń bas mamany.
- 2015-2018 jyldary QR Premer-ministri keńsesiniń qurylymynda jumys istedi.
- 2018 jyly Shymkent qalasy ákiminiń apparat basshysy, kómekshisi boldy.
- 2018-2019 jyldary - Shymkent qalasy ákimi apparaty basshysynyń orynbasary - hatshylyq meńgerýshisi.
- 2019-2020 jyldary - Shymkent qalasy Energetika jáne kommýnaldyq sharýashylyq basqarmasynyń basshysy.
- 2021 jylǵy aqpannan bastap 2023 jylǵa deiin Kólik komiteti tóraǵasynyń orynbasary qyzmetin atqardy.
Eske salaiyq, áleýmettik jelide "qarapaiym jumysshy" bolyp eńbek jolyn bastaǵan Erbol Qulymbettiń nebári bir jarym jyl ishinde Jambyl oblysyndaǵy Kóliktik baqylaý bóliminiń basshysy bolyp taǵaiyndalǵany jaily aqparat tarady. Onyń mansap jolynda bulai jyldam ósýin Kólik ministrliginde qyzmet etetin Altai Álimen týystyǵymen bailanystyrǵandar tabyldy.
Memlekettik qyzmet isteri agenttigi tekseris júrgizip, Altai Áliniń ákesi men Erbol Qulymbettiń anasy týǵan baýyr ekenin anyqtady. Alaida agenttik qoldanystaǵy "Sybailas jemqorlyqqa qarsy is-qimyl týraly" zańǵa sáikes mundai týystyq bailanys jaqyn týys nemese jekjat sanatyna kirmeitinin habarlady.
Soǵan qaramastan Erbol Qulymbet qyzmetinen óz erkimen ketý týraly sheshim qabyldady.
Al Altai Áli Astanadaǵy qyzmetinen ketse de, búgin Jambyl oblysy ákiminiń qurylys jáne turǵyn úi-kommýnaldyq sharýashylyq máseleleri jónindegi orynbasary bolyp taǵaiyndaldy.
