قازاقستان پرەزيدەنتى باكۋدەگى دۇنيەجۇزىلىك كليمات سامميتىندە ءسوز سويلەپ، اەس توڭىرەگىندە دە ءسوز قوزعادى، - دەپ حابارلايدى Dalanews.kz.
قازاقستان «كومىرتەكتى ەگىنشىلىككە»، ياعني اۋاعا تارالاتىن پارنيكتىك گازداردىڭ مولشەرىن ازايتۋ جانە توپىراقتى قۇنارلاندىرۋ ارقىلى اۋىل شارۋاشىلىعىن جۇرگىزۋ ادىستەرىن ەنگىزۋگە قاي جاعىنان دا قولايلى مەملەكەت. بۇعان ەلىمىزدەگى اۋىل شارۋاشىلىعىنا جارامدى 200 ميلليون گەكتار جەر مۇمكىندىك بەرەدى. پرەزيدەنت قىزىعۋشىلىق تانىتقان تاراپتاردى قازاقستاننىڭ وسى سالاداعى الەۋەتىن زەرتتەۋگە شاقىردى.
– ەلىمىز الەمدىك ۋران جەتكىزۋ ءىسىنىڭ 43 پايىزىن قامتاماسىز ەتەدى جانە كومىرتەگى مولشەرى تومەن قۋات كوزى سانالاتىن يادرولىق ەنەرگەتيكانى دامىتۋدا ماڭىزدى ءرول اتقارادى. بيىل قازان ايىندا وتكەن جالپىۇلتتىق رەفەرەندۋمدا حالقىمىزدىڭ باسىم بولىگى قازاقستاندا اتوم ەلەكتر ستانسياسىن سالۋدى قولدادى. ءبىز وسى سالاداعى جەتەكشى تەحنولوگيالىق الپاۋىتتارمەن سەرىكتەسە وتىرىپ، اتالعان جوبانىڭ قاۋىپسىزدىگى مەن تيىمدىلىگىن قامتاماسىز ەتۋگە ۇمتىلامىز، – دەدى مەملەكەت باسشىسى.
قاسىم-جومارت توقايەۆ دۇنيە جۇزىندەگى سۋ رەسۋرستارىنا قاتىستى پروبلەماعا دا توقتالدى.
– كليماتتىڭ وزگەرۋى جاھاندىق سۋ سيكلىنە اسەر ەتىپ وتىر. الەمدەگى تابيعات اپاتتارىنىڭ 80 پايىزدان استامى سۋ توڭىرەگىندە ورىن الادى. بيىل ءبىزدىڭ ەلىمىز بۇرىن-سوڭدى بولماعان الاپات سۋ تاسقىنىمەن بەتپە-بەت كەلدى. كەلەشەكتە وسىنداي توتەنشە جاعدايلار كەزىندە جەدەل ارەكەت ەتىپ، ودان كەيىنگى قايتا قالپىنا كەلتىرۋ جۇمىستارىن تەز اتقارۋ ءۇشىن قاۋىپ-قاتەردى باسقارۋدىڭ كەشەندى جۇيەسىن ەنگىزەمىز. سۋ ماسەلەسىنە جاھان نازارىن اۋدارۋ ماقساتىندا بيىل جەلتوقسان ايىندا فرانسيامەن بىرلەسىپ One Water ءسامميتىن وتكىزەمىز. فورۋمعا قاتىسۋشىلار سۋ رەسۋرستارىن جاھاندىق دەڭگەيدە باسقارۋ ماسەلەلەرىن تالقىلايدى. بۇگىندە كاسپيي تەڭىزىنە ءقاۋىپ ءتونىپ تۇر. الەمدەگى ەڭ ۇلكەن كولدى قۇتقارۋ – بارشاعا ورتاق مىندەت ءارى بۇل ۇزاقمەرزىمدى حالىقارالىق ىنتىماقتاستىقتى تالاپ ەتەدى. وسى ورايدا پرەزيدەنت يلحام الييەۆتىڭ كاسپيي ماڭى مەملەكەتتەرىنىڭ ساراپشىلار توبىن قۇرۋ تۋرالى ۇسىنىسىن قولدايمىز. سونىمەن قاتار قازاقستان ارال تەڭىزىن قۇتقارۋ ءۇشىن ناقتى شارالار قابىلداپ جاتىر، – دەدى پرەزيدەنت.
