Qazaqstan Prezidenti Bakýdegi Dúniejúzilik klimat sammitinde sóz sóilep, AES tóńireginde de sóz qozǵady, - dep habarlaidy Dalanews.kz.
Qazaqstan «kómirtekti eginshilikke», iaǵni aýaǵa taralatyn parniktik gazdardyń mólsherin azaitý jáne topyraqty qunarlandyrý arqyly aýyl sharýashylyǵyn júrgizý ádisterin engizýge qai jaǵynan da qolaily memleket. Buǵan elimizdegi aýyl sharýashylyǵyna jaramdy 200 million gektar jer múmkindik beredi. Prezident qyzyǵýshylyq tanytqan taraptardy Qazaqstannyń osy saladaǵy áleýetin zertteýge shaqyrdy.
– Elimiz álemdik ýran jetkizý isiniń 43 paiyzyn qamtamasyz etedi jáne kómirtegi mólsheri tómen qýat kózi sanalatyn iadrolyq energetikany damytýda mańyzdy ról atqarady. Biyl qazan aiynda ótken jalpyulttyq referendýmda halqymyzdyń basym bóligi Qazaqstanda atom elektr stantsiiasyn salýdy qoldady. Biz osy saladaǵy jetekshi tehnologiialyq alpaýyttarmen seriktese otyryp, atalǵan jobanyń qaýipsizdigi men tiimdiligin qamtamasyz etýge umtylamyz, – dedi Memleket basshysy.
Qasym-Jomart Toqaev dúnie júzindegi sý resýrstaryna qatysty problemaǵa da toqtaldy.
– Klimattyń ózgerýi jahandyq sý tsikline áser etip otyr. Álemdegi tabiǵat apattarynyń 80 paiyzdan astamy sý tóńireginde oryn alady. Biyl bizdiń elimiz buryn-sońdy bolmaǵan alapat sý tasqynymen betpe-bet keldi. Keleshekte osyndai tótenshe jaǵdailar kezinde jedel áreket etip, odan keiingi qaita qalpyna keltirý jumystaryn tez atqarý úshin qaýip-qaterdi basqarýdyń keshendi júiesin engizemiz. Sý máselesine jahan nazaryn aýdarý maqsatynda biyl jeltoqsan aiynda Frantsiiamen birlesip One Water sammitin ótkizemiz. Forýmǵa qatysýshylar sý resýrstaryn jahandyq deńgeide basqarý máselelerin talqylaidy. Búginde Kaspii teńizine qaýip tónip tur. Álemdegi eń úlken kóldi qutqarý – barshaǵa ortaq mindet ári bul uzaqmerzimdi halyqaralyq yntymaqtastyqty talap etedi. Osy oraida Prezident Ilham Álievtiń Kaspii mańy memleketteriniń sarapshylar tobyn qurý týraly usynysyn qoldaimyz. Sonymen qatar Qazaqstan Aral teńizin qutqarý úshin naqty sharalar qabyldap jatyr, – dedi Prezident.
