الماتىدا بولعان جاپپاي تٶبەلەسكە قاتىستى قىلمىستىق ٸس ٷش باپ بويىنشا تەرگەلٸپ جاتىر. بۇل تۋرالى مەجٸلٸس كۋلۋارىندا ٸشكٸ ٸستەر مينيسترٸنٸڭ ورىنباسارى سانجار ەدٸلوۆ مەلٸمدەدٸ, دەپ حابارلايدى dalanews.kz.
ونىڭ ايتۋىنشا, قازٸرگٸ تاڭدا قىلمىستىق ٸس ادام ٶلتٸرۋ جەنە بۇزاقىلىقتى قوسا العاندا ٷش باپ بويىنشا قوزعالعان. ٸس اياسىندا قاجەتتٸ تەرگەۋ امالدارى جٷرگٸزٸلٸپ جاتىر.
"نەگٸزگٸ كٷدٸكتٸلەر تەرگەۋ سوتىنىڭ سانكتسيياسىمەن قاماۋعا الىندى. قازٸر بارلىق مەن-جاي جان-جاقتى تەكسەرٸلٸپ جاتىر", – دەدٸ سانجار ەدٸلوۆ.
مينيستر ورىنباسارى تاراپتار ايتىپ وتىرعان بارلىق ۋەج بەن دەرەك سوتقا دەيٸنگٸ تەرگەۋ بارىسىندا مۇقييات قارالاتىنىن اتاپ ٶتتٸ.
ايتا كەتەيٸك, الدىن الا مەلٸمەت بويىنشا, جانجال الماتىداعى كومپيۋتەر كلۋبتارىنىڭ بٸرٸندە باستالعان. كەيٸن جاستار اراسىنداعى كيكٸلجٸڭ كٶشەدە جالعاسىپ, جاپپاي تٶبەلەسكە ۇلاسقان.
قازا تاپقان جاسٶسپٸرٸمدەردٸڭ بٸرٸنٸڭ اناسى ەلەۋمەتتٸك جەلٸدە وقيعاعا قاتىستى ٶز نۇسقاسىن ايتقان. ونىڭ سٶزٸنشە, تٶبەلەس كەزٸندە بەلگٸسٸز جٸگٸت ۇلىنىڭ دوسىن پىشاقپەن جٷرەك تۇسىنان جارالاعان. وسىدان كەيٸن اشۋعا بۋلىققان جاسٶسپٸرٸم كٷدٸكتٸنٸڭ سوڭىنان جٷگٸرگەن. اناسىنىڭ ايتۋىنشا, سول سەتتە ونىڭ ۇلىن دا پىشاقتاپ كەتكەن.
