8 قاراشادا الماتىدا قىتايدان تاريحي وتانىنا ورالعان قانداستاردىڭ تۇرمىسى مەن قوعامعا بەيٸمدەلۋٸن كٶرسەتەتٸن ەكٸ دەرەكتٸ فيلمنٸڭ تۇساۋكەسەرٸ ٶتەدٸ. كٶرەرمەن نازارىنا رەجيسسەر تٸلەك ىرىسبەكتٸڭ "تۇرسىنحان اپايدىڭ شەبەرحاناسى" جەنە "قانداس اسپازدىڭ ارمانى" تۋىندىلارى ۇسىنىلادى, دەپ حابارلايدى dalanews.kz.
قوس فيلمدە قانداستاردىڭ جاڭا ورتاعا بەيٸمدەلۋٸ, كٷندەلٸكتٸ تۇرمىسى جەنە كەسٸپ باستاۋ جولىنداعى تەجٸريبەسٸ كٶرسەتٸلەدٸ. رەجيسسەر كەيٸپكەرلەردٸڭ ٶمٸرٸ ارقىلى ولاردىڭ قوعامنان ٶز ورنىن تابۋى مەن جاڭا بايلانىستار قالىپتاستىرۋىنا نازار اۋدارعان.
قول ەڭبەگٸمەن كەسٸبٸن قالىپتاستىرعان تۇرسىنحان اپاي
"تۇرسىنحان اپايدىڭ شەبەرحاناسى" دەرەكتٸ فيلمٸ قىتايدان قازاقستانعا كٶشٸپ كەلٸپ, ٶز ەڭبەگٸمەن كەسٸبٸن جولعا قويعان ەيەلدٸڭ ٶمٸرٸن باياندايدى.
تۇرسىنحان اپاي اقشي اۋىلىنداعى شاعىن شەبەرحانادا اياقكيٸمدٸ قولمەن تٸگەدٸ. تۋىندىدا ونىڭ كٷندەلٸكتٸ تٸرشٸلٸگٸ, تاباندىلىعى مەن ماڭداي تەرٸنٸڭ ارقاسىندا جاڭا ورتاعا بەيٸمدەلۋ جولى كٶرسەتٸلگەن. رەجيسسەر بٸر ادامنىڭ ٶمٸرٸ ارقىلى تۋعان جەرگە ورالعان قانداستاردىڭ تۇرمىسىندا كەزدەسەتٸن قيىندىقتارى مەن قول جەتكٸزگەن مٷمكٸندٸكتەرٸن اشۋعا تىرىسقان.
الماتىدا دەمحانا اشۋدى ارماندايتىن اسپاز
"قانداس اسپازدىڭ ارمانى" فيلمٸنٸڭ باستى كەيٸپكەرٸ – اڭسار قوجانۇلى. ول ەكٸ جىل بۇرىن قازاقستانعا قونىس اۋدارىپ, ەل ازاماتتىعىن العان. قازٸر وتباسىمەن بٸرگە الماتى وبلىسىنداعى بەيدٸبەك بي اۋىلىندا تۇرادى.
اڭساردىڭ باستى ارمانى – الماتى قالاسىندا جەكە دەمحاناسىن اشۋ. فيلمدە ونىڭ اسپازدىق ٶنەرٸ, كەسٸپ باستاۋعا تالپىنىسى جەنە ماقساتىنا جەتۋ جولىنداعى ەڭبەگٸ باياندالادى. سونىمەن قاتار كٶرەرمەن ٶڭٸردەگٸ شىڭجاڭ اسحاناسى ٷلگٸسٸندە جۇمىس ٸستەيتٸن دەمحانالاردىڭ تىنىس-تٸرشٸلٸگٸمەن تانىسادى.
فيلم كٶرسەتٸلٸمٸنەن كەيٸن ويتالقى ٶتەدٸ
ەكٸ دەرەكتٸ فيلمنٸڭ كٶرسەتٸلٸمٸ 8 قاراشادا ساعات 15:00-دە الماتى ٶنەر مۋزەيٸندە ٶتەدٸ. كٶرسەتٸلٸمنەن كەيٸن قانداستاردىڭ مەديادا بەينەلەنۋٸ, ولار تۋرالى ماتەريال ەزٸرلەۋدەگٸ ەتيكا, قوعامعا بەيٸمدەلۋ, كەسٸپ جٷرگٸزۋ جەنە تٸل مەسەلەلەرٸ تالقىلانادى.
پٸكٸرتالاسقا جۋرناليست ەرٸ مەديا ساراپشى بەللا قاسىمقىزى, شىعىستانۋشى, تاريحشى جەنە زەرتتەۋشٸ ەلدەس وردا, سونداي-اق فيلمدەردٸڭ رەجيسسەرٸ تٸلەك ىرىسبەك قاتىسادى. كەزدەسۋدٸ جازۋشى, اۋدارماشى ەرٸ Friedrich Shegirtke جوباسىنىڭ اۆتورى سافينا اقتاي جٷرگٸزەدٸ.
تۋىندىلار ٶنەر جەنە قوعام تاقىرىبىن كٶتەرەتٸن Friedrich Shegirtke تەۋەلسٸز مەدياجوباسى اياسىندا جارىق كٶرگەن. بۇعان دەيٸن جوبا تٸلەك ىرىسبەكتٸڭ "شىڭجاڭدىق ادام", "دينا جەنە داچانىڭ بالالارى" جەنە "ماقپال" دەرەكتٸ فيلمدەرٸن ۇسىنعان.
ٸس-شارا الماتى قالاسى, ەل-فارابي داڭعىلى, 28 مەكەنجايىندا ٶتەدٸ.
