8 qarashada Almatyda Qytaidan tarihi Otanyna oralǵan qandastardyń turmysy men qoǵamǵa beiimdelýin kórsetetin eki derekti filmniń tusaýkeseri ótedi. Kórermen nazaryna rejisser Tilek Yrysbektiń "Tursynhan apaidyń sheberhanasy" jáne "Qandas aspazdyń armany" týyndylary usynylady, dep habarlaidy dalanews.kz.
Qos filmde qandastardyń jańa ortaǵa beiimdelýi, kúndelikti turmysy jáne kásip bastaý jolyndaǵy tájiribesi kórsetiledi. Rejisser keiipkerlerdiń ómiri arqyly olardyń qoǵamnan óz ornyn tabýy men jańa bailanystar qalyptastyrýyna nazar aýdarǵan.
Qol eńbegimen kásibin qalyptastyrǵan Tursynhan apai
"Tursynhan apaidyń sheberhanasy" derekti filmi Qytaidan Qazaqstanǵa kóship kelip, óz eńbegimen kásibin jolǵa qoiǵan áieldiń ómirin baiandaidy.
Tursynhan apai Aqshi aýylyndaǵy shaǵyn sheberhanada aiaqkiimdi qolmen tigedi. Týyndyda onyń kúndelikti tirshiligi, tabandylyǵy men mańdai teriniń arqasynda jańa ortaǵa beiimdelý joly kórsetilgen. Rejisser bir adamnyń ómiri arqyly týǵan jerge oralǵan qandastardyń turmysynda kezdesetin qiyndyqtary men qol jetkizgen múmkindikterin ashýǵa tyrysqan.
Almatyda dámhana ashýdy armandaityn aspaz
"Qandas aspazdyń armany" filminiń basty keiipkeri – Ańsar Qojanuly. Ol eki jyl buryn Qazaqstanǵa qonys aýdaryp, el azamattyǵyn alǵan. Qazir otbasymen birge Almaty oblysyndaǵy Báidibek bi aýylynda turady.
Ańsardyń basty armany – Almaty qalasynda jeke dámhanasyn ashý. Filmde onyń aspazdyq óneri, kásip bastaýǵa talpynysy jáne maqsatyna jetý jolyndaǵy eńbegi baiandalady. Sonymen qatar kórermen óńirdegi Shyńjań ashanasy úlgisinde jumys isteitin dámhanalardyń tynys-tirshiligimen tanysady.
Film kórsetiliminen keiin oitalqy ótedi
Eki derekti filmniń kórsetilimi 8 qarashada saǵat 15:00-de Almaty óner mýzeiinde ótedi. Kórsetilimnen keiin qandastardyń mediada beinelenýi, olar týraly material ázirleýdegi etika, qoǵamǵa beiimdelý, kásip júrgizý jáne til máseleleri talqylanady.
Pikirtalasqa jýrnalist ári media sarapshy Bella Qasymqyzy, shyǵystanýshy, tarihshy jáne zertteýshi Eldes Orda, sondai-aq filmderdiń rejisseri Tilek Yrysbek qatysady. Kezdesýdi jazýshy, aýdarmashy ári Friedrich Shegirtke jobasynyń avtory Safina Aqtai júrgizedi.
Týyndylar óner jáne qoǵam taqyrybyn kóteretin Friedrich Shegirtke táýelsiz mediajobasy aiasynda jaryq kórgen. Buǵan deiin joba Tilek Yrysbektiń "Shyńjańdyq adam", "Dina jáne dachanyń balalary" jáne "Maqpal" derekti filmderin usynǵan.
Is-shara Almaty qalasy, Ál-Farabi dańǵyly, 28 mekenjaiynda ótedi.
