ءبىرىنشى كەزەڭگە ەكى اۆتوماتتاندىرىلعان گاز تاراتۋ ستانسياسىنىڭ قۇرىلىسى جانە «الماتى-بايسەركە-تالعار» جانە «قازاقستان-قىتاي» ماگيسترالدىق گاز قۇبىرلارىن بىرىكتىرەتىن ءتىر-04 جالعاستىرعىش قۇبىرلارى كىردى.
سونىمەن بىرگە باتىس جىلۋ كەشەنى اۆتوماتتاندىرىلعان گاز تاراتۋ ستانسياسىنا جوندەۋ جانە قالپىنا كەلتىرۋ جۇمىستارى جۇرگىزىلدى.
اۆتوماتتاندىرىلعان گاز تاراتۋ ستانسياسىن جانە جالعاستىرعىش قۇبىردى (ءتىر-04) ىسكە قوسۋعا ارنالعان ءىس-شاراعا الماتى قالاسى اكىمىنىڭ ورىنباسارى اسقار ءامرين «سامۇرىق-قازىنا» اق ستراتەگيا جانە اكتيۆتەردى باسقارۋ جونىندەگى باسقارۋشى ديرەكتورى ەلجاس وتىنشييەۆ، الماتى وبلىسى اكىمىنىڭ ورىنباسارى نۇرجان قۇدايبەرگەنوۆ جانە «QazaqGaz «ۇك» اق باسقارما ءتوراعاسى سانجار جاركەشوۆ قاتىستى.
– الماتى جەو ءۇشىن گاز ينفراقۇرىلىمى قۇرىلىسىنىڭ ءبىرىنشى كەزەڭى اياقتالدى. بۇل مەملەكەت باسشىسىنىڭ الماتى جىلۋ ەلەكتر ورتالىعىن گازعا كوشىرۋ جونىندەگى تاپسىرماسىن ىسكە اسىرۋداعى العاشقى قادام. 2030 جىلعا دەيىن قالانىڭ ونەركاسىپتىك جانە جەكە سەكتورلارداعى نىساندارى گازداندىرىلادى. ءتيىستى جوبالار قالانى دامىتۋ باعدارلاماسىندا جانە الماتىنىڭ جاڭارتىلعان باس جوسپارىندا قامتىلعان، – دەپ اتاپ ءوتتى الماتى اكىمىنىڭ ورىنباسارى اسقار ءامرين.
اۆتوماتتاندىرىلعان گاز تاراتۋ ستانسياسى 2-جىلۋ ەلەكتر ورتالىعىن تابيعي گازبەن قامتاماسىز ەتۋگە ارنالعان. ولاردىڭ ونىمدىلىگى 250 جانە 150 مىڭ تەكشە مەتر/ساع. قۇرايدى.
– مەملەكەت باسشىسى قاسىم-جومارت توقايەۆ سامۇرىق-قازىنا قورى، QazaqGaz ۇلتتىق كومپانياcى مەن الماتى قالاسىنىڭ اكىمدىگىنە اتالعان جوبانى جەدەلدەتۋدى تاپسىرعان بولاتىن. جالپى، ەلىمىزدىڭ ەنەرگەتيكا سالاسى، الماتى قالاسىنىڭ ەكولوگياسى، ورتا جانە شاعىن بيزنەسى ءۇشىن وتە ماڭىزدى جوبا دەپ ايتسام قاتەلەسپەيمىن. الماتى قالاسىنىڭ يندۋستريالدىق ايماعىندا ورنالاسقان بيزنەس سۋبەكتىلەرىنە ۇلكەن كومەك بولادى، – دەدى «سامۇرىق-قازىنا» اق ستراتەگيا جانە اكتيۆتەردى باسقارۋ جونىندەگى تەڭ باسقارۋشى ەلجاس وتىنشييەۆ.
سونداي-اق «قازاقستان-قىتاي» ماگيسترالدى گاز قۇبىرى مەن «الماتى-بايسەركە-تالعار» ماگيسترالدى گاز قۇبىرى اراسىنداعى TIP-04 جالعاستىرعىش گاز قۇبىرى الماتى جىلۋ ەلەكتر ورتالىعىن عانا ەمەس، سونىمەن بىرگە الماتى جانە الماتى وبلىسىنىڭ تۇرعىندارىن دا تۇراقتى گازبەن قامتاماسىز ەتۋگە مۇمكىندىك بەرەدى. گاز قۇبىرىنىڭ جالپى ۇزىندىعى – 9،6 كم، ونىمدىلىگى – 1000 مىڭ م3/ساع.
– مەملەكەت باسشىسىنىڭ تاپسىرماسى بويىنشا QazaqGaz مەرزىمىنەن بۇرىن الماتى جىلۋ ەلەكتر ورتالىعىن گاز ينفراقۇرىلىمىنا اۋىستىرۋ جۇمىستارىنىڭ ءبىرىنشى كەزەڭىن اياقتادى. بۇدان بولەك، جىلۋ ەلەكتر ورتالىعىن گازعا كوشىرۋ جۇمىستارىنىڭ كەلەسى كەزەڭىنە ءوتۋ ءۇشىن «الماتى-بايسەركە-تالعار» ماگيسترالدىق گاز قۇبىرىنىڭ ەكىنشى جەلىسىن سالۋعا كىرىسىپ جاتىرمىز، – دەدى QazaqGaz باسشىسى.
بۇدان بولەك، «باتىس جىلۋ كەشەنى» اۆتوماتتاندىرىلعان گاز تاراتۋ ستانسياسى «الماتى» يندۋستريالىق ايماعىندا ءىرى ونەركاسىپتىك جانە وندىرىستىك بيزنەس-جوبالاردى ىسكە اسىرۋ ءۇشىن گاز جەتكىزۋگە مۇمكىندىك بەردى.
«باتىس جىلۋ كەشەنى» اۆتوماتتاندىرىلعان گاز تاراتۋ ستانسياسىنىڭ قۇرىلىسىن 2016 جىلى جەكە مەردىگەرلىك ۇيىم جۇرگىزگەن، ءبىراق سول كۇيى پايدالانۋعا بەرىلمەگەن. 2023 جىلى «QazaqGaz «ۇك» اق اتالعان ولقىلىقتى جويىپ، اتالعان ستانسيانى ءوز قاراجاتى ەسەبىنەن جاڭعىرتتى. اگتس-تىڭ ونىمدىلىگى 140 000 م3/ساع قۇرايدى، ونىڭ ىشىندە ستانسيانىڭ ەكى جەلىسى – الماتى تۇرعىندارىنا ساعاتىنا 90 000 م3 جانە يندۋستريالىق ايماققا ساعاتىنا 50 000 م3 گاز تاراتادى.
اتاپ وتەرلىگى، الماتى جەو جاڭعىرتۋ جوباسىن «سامۇرىق-ەنەرگو» اق جۇزەگە اسىرۋدا. QazaqGaz كومپانياسى گاز ينفراقۇرىلىمىن سالۋمەن اينالىسادى. اتالعان جوبا – قالاداعى جانە قالا ماڭىنداعى ەلدىمەكەندەردەگى اۋانىڭ لاستانۋىن ازايتۋ ارقىلى الماتى تۇرعىندارىنىڭ ءومىر ساپاسىن جاقسارتۋعا باعىتتالادى، سونداي-اق ەنەرگيا تاپشىلىعىن جويۋعا سەرپىن بەرەدى.
