الماتىداعى بۇرىنعى «اققۋ» كافەسى تۋرالى ءجيى ەسكە الادى. جاستىق شاققا دەگەن ساعىنىشى، وتكەن كۇنگە دەگەن وشپەس سەزىمى سول ءبىر «اققۋ» كافەسىمەن شەندەسىپ جاتاتىنداي. قارسى الدىندا جۇبى جازىلماي ءجۇزىپ جۇرەتىن قوس اققۋ تۋرالى ەستەلىكتەرى ناعىز ەرتەگىدەگىدەي كورىنىستى كوز الدىڭىزعا اكەلەدى.

الماتىداعى قانشاما جاندى توعىستىرعان «ساياحات» اۆتوبەكەتىندەگى «ساعاتتىڭ ءتۇبى» دا (تۇرعىنداردىڭ اتاۋى بويىنشا) ساعىمعا اينالعانىنا كوز جەتكىزەسىڭ. «ساعاتتىڭ تۇبىندە» ساعاتتاپ كۇتەتىن كۇندەردى ەسكە الىپ قانا قويادى، ولار. ءار سەنبىنىڭ كەشى، الماتىعا اياق باسقان ءار جاستىڭ قۇبىلاسى سول «ساياحاتتاعى» «ساعاتتىڭ ءتۇبى» بولاتىن. ويتكەنى، كەزدەسۋ ورنىن بەلگىلەگەن ۋاقىتتا كوپشىلىككە تانىس، ەل بىلەتىن جەر دەپ تاڭداۋ سوعان تۇسەتىن كورىنەدى. مىنە، ساناداعى ءىزى وشپەگەن ەستەلىكتەردى سول ۋاقىتتاردا حالىق تابيعاتتىڭ سىيلاعان سىيى دەپ باعا بەرەتىن. «اققۋ ۇشىپ كولگە كەتتى، قۇماي ۇشىپ شولگە كەتتى»  دەگەندەي، ءقازىر سول قوس اققۋ قايدا كەتتى ەكەن؟» – دەيدى ولار ءبىر ءسات ەسكە الىپ.

بۇگىندە «ساعاتتىڭ ءتۇبى» مەن «اققۋ» كافەسىنىڭ جۇرناعى دا قالمادى. الايدا، كەشەگى كوركەم كۇندەردىڭ بەلگىسىندەي بولىپ قالعان كوركەم جەر «اققۋ» بۇرقاعى قايتا قالپىنا كەلتىرىلىپ، ايدىنعا اققۋلار قايتا ورالدى. ونىڭ قايتا جاڭعىرۋىنا الماتى قالاسى اكىمدىگى مەن الماتى زووباعىنىڭ باستاماسى سەبەپشى بولىپ وتىر. ماڭىزدى ءارى قىزىقتى شاراعا قوعامدىق بىرلەستىك مۇشەلەرى، قالالىق ءماسليحاتتىڭ دەپۋتاتتارى، الماتى قالاسى اكىمدىگىنىڭ وكىلدەرى جانە قاراپايىم قالا تۇرعىندارى قاتىسىپ، ورتاق قۋانىشتارىمەن ءبولىستى. «بۇل الماتىلىقتار ءۇشىن ەرەكشە ورىن. بىزگە بالا كەزىمىزدەن تانىس. قوس اققۋدىڭ بىرگە جۇزگەنىن شىنىمەن دە كوزىمىز كورگەن ەدى. ءبىزدىڭ ماقساتىمىز دا سول كوڭىلگە قۋانىش سىيلايتىن اسەم كورىنىستى قايتا قالپىنا كەلتىرۋ. سول ءۇشىن قۇبىرلار جۇرگىزىلىپ، سۋبۇرقاق قالپىنا كەلتىرىلدى»، – دەدى الماتى قالالىق ءماسليحاتىنىڭ دەپۋتاتى كونستانتين اۆەرشين.

زووباق قىزمەتكەرلەرىنىڭ ايتۋىنشا، قۇستارعا سۋبۇرقاق ەشقانداي ءقاۋىپ توندىرمەيدى جانە ولار لايىقتى دارەجەدە باعىپ-كۇتىلەتىن بولادى. بەس جانە التى جاستاعى اققۋلار كۇنىنە ءبىر رەت ءداندى جەمدەرمەن قورەكتەندىرىلەدى. جانە دە تاڭنان كەشكە دەيىن ارنايى قىزمەتكەرلەر كۇزەتەتىن بولادى. كۇزدە بۇرقاق وشىرىلگەن سوڭ اققۋلار قايتادان زووباققا الىنادى.

سونىمەن قاتار، سۋبۇرقاقتىڭ ماڭايىنا دا زاماناۋي ۇلگىگە ساي جاڭعىرتۋ جۇمىستارى جۇرگىزىلگەن. بۇگىندە سۋبۇرقاقتى جاعالاي جۇرەتىن قالا تۇرعىندارى ءۇشىن بۇل جەر تاپتىرماس دەمالىس ورنىنا اينالىپ وتىر. ءبىز دە سان جىلداردى ارتتا قالدىرىپ، ايدىنىنا قايتا ورالعان اققۋلار جانعا جىلۋلىق سىيلايتىن سەزىم سىرلارى مەن جاڭا وقيعالاردىڭ ماڭگىلىك كەيىپكەرى بولسىن دەگەن تىلەكتەمىز.

 

ءمولدىر نۇرتاي

 

«الماتى اقشامى» گازەتى