Almatyǵa aqqý qaita oraldy
Almatydaǵy qanshama jandy toǵystyrǵan «Saiahat» avtobeketindegi «saǵattyń túbi» da (turǵyndardyń ataýy boiynsha) saǵymǵa ainalǵanyna kóz jetkizesiń. «Saǵattyń túbinde» saǵattap kútetin kúnderdi eske alyp qana qoiady, olar. Ár senbiniń keshi, Almatyǵa aiaq basqan ár jastyń qubylasy sol «Saiahattaǵy» «saǵattyń túbi» bolatyn. Óitkeni, kezdesý ornyn belgilegen ýaqytta kópshilikke tanys, el biletin jer dep tańdaý soǵan túsetin kórinedi. Mine, sanadaǵy izi óshpegen estelikterdi sol ýaqyttarda halyq tabiǵattyń syilaǵan syiy dep baǵa beretin. «Aqqý ushyp kólge ketti, qumai ushyp shólge ketti» degendei, qazir sol qos aqqý qaida ketti eken?» – deidi olar bir sát eske alyp.
Búginde «saǵattyń túbi» men «Aqqý» kafesiniń jurnaǵy da qalmady. Alaida, keshegi kórkem kúnderdiń belgisindei bolyp qalǵan kórkem jer «Aqqý» burqaǵy qaita qalpyna keltirilip, aidynǵa aqqýlar qaita oraldy. Onyń qaita jańǵyrýyna Almaty qalasy ákimdigi men Almaty zoobaǵynyń bastamasy sebepshi bolyp otyr. Mańyzdy ári qyzyqty sharaǵa qoǵamdyq birlestik músheleri, qalalyq máslihattyń depýtattary, Almaty qalasy ákimdiginiń ókilderi jáne qarapaiym qala turǵyndary qatysyp, ortaq qýanyshtarymen bólisti. «Bul almatylyqtar úshin erekshe oryn. Bizge bala kezimizden tanys. Qos aqqýdyń birge júzgenin shynymen de kózimiz kórgen edi. Bizdiń maqsatymyz da sol kóńilge qýanysh syilaityn ásem kórinisti qaita qalpyna keltirý. Sol úshin qubyrlar júrgizilip, sýburqaq qalpyna keltirildi», – dedi Almaty qalalyq máslihatynyń depýtaty Konstantin Avershin.
Zoobaq qyzmetkerleriniń aitýynsha, qustarǵa sýburqaq eshqandai qaýip tóndirmeidi jáne olar laiyqty dárejede baǵyp-kútiletin bolady. Bes jáne alty jastaǵy aqqýlar kúnine bir ret dándi jemdermen qorektendiriledi. Jáne de tańnan keshke deiin arnaiy qyzmetkerler kúzetetin bolady. Kúzde burqaq óshirilgen soń aqqýlar qaitadan zoobaqqa alynady.
Sonymen qatar, sýburqaqtyń mańaiyna da zamanaýi úlgige sai jańǵyrtý jumystary júrgizilgen. Búginde sýburqaqty jaǵalai júretin qala turǵyndary úshin bul jer taptyrmas demalys ornyna ainalyp otyr. Biz de san jyldardy artta qaldyryp, aidynyna qaita oralǵan aqqýlar janǵa jylýlyq syilaityn sezim syrlary men jańa oqiǵalardyń máńgilik keiipkeri bolsyn degen tilektemiz.
Móldir NURTAI
«Almaty aqshamy» gazeti
