كوروناۆيرۋس كارىنە مىنگەن وتكەن اپتالاردا الماتىداعى ءدارىحانالاردا دارى-دارمەك جەتىسپەۋشىلىگى تۋىنداعانى بەلگىلى. بۇل ماسەلە بۇگىندەرى شەشىلگەن. الماتى قالاسىنىڭ اكىمى باقىتجان ساعىنتايەۆ بۇل جاعدايدىڭ ناقتى سەبەبىن اتاپ، ونى قالاي شەشكەندەرىن ايتتى.
ساعىنتايەۆتىڭ ايتۋىنشا، توتەنشە جاعداي كەزىندە دارى-دارمەكتەرگە ەرەكشە قاجەتتىلىك بولا قويماعان (ماسكادان باسقاسىنا)، ءبىراق ماۋسىم ايىنىڭ سوڭىنان باستاپ كوروناۆيرۋس ىندەتى ءورشىپ، ادامدار ءدارىحاناعا جاپپاي لاپ قويعان.
ايتالىق، اكىم مامىر ايىندا ءدارىحانالار پاراسەتامولدىڭ 50 مىڭ قاپتاماسىن ساتسا، ال شىلدە ايىنىڭ 3 اپتاسىندا بۇل ءدارىنىڭ ميلليون قاپتاماسى بىردەن ساتىلىپ كەتكەنىن ەسكە سالدى.
نەلىكتەن سۇرانىستىڭ ارتۋىنا بايلانىستى ۇسىنىستى دا ارتتىرۋ ماسەلەسى ۇزاققا سوزىلىپ، تاپشىلىق ورىن العان. اكىمنىڭ ايتۋىنشا، دارى-دارمەكتەردى ساتۋشىلار مەن جەتكىزۋشىلەردە تاپشىلىقتى جاباتىنداي ۇلكەن قور بولماعان، ەشكىم مۇنداي سۇرانىستى كۇتپەگەن.
– بۇل دارى-دارمەكتەردى رەسەيدەن، ءۇندىستاننان اكەلۋ ءۇشىن بەلگىلى ءبىر رۇقسات كەرەك، ءبىز ءبىر رەتتىك يمپورتقا رۇقسات الۋ ءۇشىن قۇجاتتاردى راسىمدەۋ ءۇشىن، 1 كۇن ىشىندە قۇجاتتاردى راسىمدەۋگە قولداۋ كورسەتۋ ءۇشىن ۇكىمەتكە فارماسيەۆتيكالىق ونەركاسىپ قاۋىمداستىقتارىنىڭ كومەگىنە جۇگىندىك. ادەتتە، بۇل پروسەسس 2 اپتا ۋاقىتتى الادى.
ەاەو شەڭبەرىندە وندىرىلگەن دارى-دارمەكتەردى وندىرۋشىلەردەن تاۋاردى ساتىپ الا باستاعان كەزدە، زاڭنىڭ تالابى بويىنشا ءار قاپتامادا قازاقشا جازۋ، ياعني دارى-دارمەكتىڭ تۇسىنىكتەمە قاعازىندا قازاقشا نۇسقاۋ بولۋى كەرەك ەدى.
ءبىراق مۇنداي كولەمدەگى دارى-دارمەكتى قازاق تىلىنە اۋدارىپ جاتۋعا ۋاقىت تىعىز ەكەنىن تۇسىندىك. ياعني، بىزدە ءدارى بار، ءبىراق ونى وسىنداي سەبەپپەن جەتكىزە المادىق.
ۇكىمەتكە قايتا شىقتىق، ەگەر نۇسقاۋلىق ورىس تىلىندە جازىلسا، ونى قازاقشاعا اۋدارۋعا ۋاقىت بولماعاندىقتان تەز ارادا شارالار قابىلداسا دەدىك.
ءبىز تاپشىلىقتى تەزىرەك جابۋىمىز كەرەك ەدى. كەدەرگىلەر بولدى، ءبىز ونى تۇزەتكەنگە دەيىن بەلگىلى ءبىر ۋاقىت كەتتى. ۇكىمەتتىڭ ارقاسىندا جەدەل شەشىم قابىلداندى، ءسويتىپ كەدەرگىلەر جويىلدى.
ۇشاق كەلىپ، ءبىز تاۋاردى كەدەننەن وتكىزىپ العانشا وسىنداي پروبلەمالار شەشىلدى، نورماتيۆتىك قۇجاتتار قايتا جاسالدى. ەڭ باستى مىندەت – دۇربەلەڭدى باسىپ، دارى-دارمەك تاپشىلىعىن جويۋ بولدى ول كەزدە، دەدى باقىتجان ساعىنتايەۆ.
ءقازىر اكىمدىكتە دارى-دارمەكتى جەتكىزۋ توبى جۇمىس ىستەپ جاتىر، ولار ءوز قولىمەن ءدارىحانالارعا دارى-دارمەكتەردى جەتكىزەدى، نەگىزگى تىزىمگە باسىمدىلىق بەرىلەدى.
– ءار ءدارىحانانى قامتاماسىز ەتۋ مۇمكىن ەمەس، بىزدە مىڭعا جۋىق كىشكەنتاي ءدارىحانا بار، ءبىراق الدىندا باستى دەگەن 105 ءدارىحانانى قامتاماسىز ەتتىك، ءقازىر بۇل سيفردى 385-كە جەتكىزدىك، بۇل ءتىزىم بىرتىندەپ ءوسىپ كەلەدى، – دەدى ساعىنتايەۆ.
قالا باسشىسى ءقازىر الماتىلىقتاردىڭ وزدىگىنەن ەمدەلۋ ءتيىمسىز ەكەنىن تۇسىنگەنىن، سوندىقتان اۋىرسا بىردەن دارىگەرگە كورىنىپ جاتقانىن، وسىعان بايلانىستى قالادا جاعدايى اۋىر ناۋقاستاردىڭ سانى كۇرت ازايىپ كەلە جاتقانىن باسا ايتتى.
